កងកម្លាំងឆ្មាំបដិវត្តន៍អ៊ីស្លាមអ៊ីរ៉ង់ (IRGC)អះអាងថា ខ្លួនបានរឹបអូសកប៉ាល់ដឹកប្រេងមួយគ្រឿង ឈ្មោះ Ocean Koi ក្នុង«ប្រតិបត្តិការពិសេស» នៅឈូងសមុទ្រអូម៉ង់។
ដោយនិយាយថា កប៉ាល់នេះកំពុងព្យាយាម«រំខានដល់ការនាំចេញប្រេង និងផលប្រយោជន៍ របស់ប្រទេសអ៊ីរ៉ង់»។
សារព័ត៌មានAl Jazeera នៅថ្ងៃទី០៨.០៥.២០២៦។
នៅក្នុងសេចក្តីថ្លែងការណ៍មួយ ចុះផ្សាយដោយទីភ្នាក់ងារសារព័ត៌មាន Fars អ្នកនាំពាក្យម្នាក់មកពីកងទ័ពបាននិយាយថា«កងអនុសេនាធំ និងកងម៉ារីនរបស់កងទ័ពជើងទឹកអ៊ីរ៉ង់ បានដឹកនាំកប៉ាល់ដឹកប្រេងដែលបង្កបញ្ហាទៅកាន់ឆ្នេរសមុទ្រភាគខាងត្បូងនៃប្រទេស»។
យោងតាមទីភ្នាក់ងារសារព័ត៌មាន IRNA សេចក្តីថ្លែងការណ៍មួយពីកងទ័ពបាននិយាយថាខ្លួននឹង«ការពារផលប្រយោជន៍ និងទ្រព្យសម្បត្តិរបស់ប្រជាជាតិអ៊ីរ៉ង់យ៉ាងខ្លាំងក្លានៅក្នុងដែនទឹកនៃប្រទេសយើង ហើយនឹងមិនអត់ឱនចំពោះការរំលោភបំពាន ឬអ្នកឈ្លានពានណាមួយឡើយ»។
ទូរទស្សន៍រដ្ឋ បានចេញផ្សាយវីដេអូមួយអំពីកងកម្លាំងអ៊ីរ៉ង់កំពុងឡើងលើ និងឃុំខ្លួនកប៉ាល់នោះ។
យោងតាម Marine Tracker កប៉ាល់នេះត្រូវបានចុះបញ្ជីនៅ Barbados។ លោក Resul Serder នៃ Al Jazeera ដែលរាយការណ៍ពីទីក្រុងតេអេរ៉ង់ បាននិយាយថា នេះមិនមែនជាលើកទីមួយទេដែល IRGC បានរឹបអូសកប៉ាល់ ។
ដោយសំដៅទៅលើករណីចំនួនបី ដែលបានបញ្ជាក់នៅក្នុងច្រកសមុទ្រ Hormuz ដែលជាផ្លូវទឹកមួយដែលភ្ជាប់ឈូងសមុទ្រជាមួយឈូងសមុទ្រអូម៉ង់។ ទោះជាយ៉ាងណាក៏ដោយ លោកបានពន្យល់ថា វាបង្ហាញពីការផ្លាស់ប្តូរនៅក្នុងប្រទេសអ៊ីរ៉ង់។
លោក Serder បាននិយាយថា “ប្រជាជនអ៊ីរ៉ង់កំពុងមើលឃើញថា សង្គ្រាមបានផ្លាស់ប្តូរបរិយាកាសយុទ្ធសាស្ត្រនៅក្នុងតំបន់ ហើយច្រកសមុទ្រទាំងនេះ និងឈូងសមុទ្រត្រូវបានប្រើប្រាស់ប្រឆាំងនឹងសន្តិសុខជាតិរបស់យើង៕