សភាKnesset បានអនុម័តការអានលើកដំបូងលើសេចក្តីព្រាងច្បាប់រំលាយសភា ដោយមានសមាជិកសភា១០៦នាក់ក្នុងចំណោម១២០នាក់បោះឆ្នោតគាំទ្រ និងគ្មានសំឡេងប្រឆាំង។
ប្រភពពីសារព័ត៌មានAnadolu Agency នៅថ្ងៃទី២ខែមិថុនា។
តាមប្រព័ន្ធផ្សព្វផ្សាយអ៊ីស្រាអែល សេចក្តីព្រាងច្បាប់នេះបានកំណត់ជម្រើសកាលបរិច្ឆេទបោះឆ្នោតរវាងថ្ងៃទី៨ ខែកញ្ញា និងថ្ងៃទី២០ ខែតុលា ឆ្នាំ២០២៦។ គណបក្ស Shas គាំទ្រឱ្យបោះឆ្នោតនៅថ្ងៃទី១៥ ខែកញ្ញា ខណៈគណបក្ស Likud របស់នាយករដ្ឋមន្ត្រី Benjamin Netanyahu ចង់ពន្យារពេលរហូតដល់ចុងអាណត្តិ។
ការជំរុញឱ្យមានការបោះឆ្នោតមុនកំណត់កើតឡើង បន្ទាប់ពីរដ្ឋាភិបាលមិនអាចអនុម័តច្បាប់លើកលែងជនជាតិយូដាអូស្សូដក់ស៍ពីការបម្រើកងទ័ពបាន។ ទោះជាយ៉ាងណា សេចក្តីព្រាងច្បាប់នេះនៅត្រូវឆ្លងកាត់ការអានលើកទី២ និងទី៣ ទៀត មុននឹងក្លាយជាច្បាប់ និងកំណត់កាលបរិច្ឆេទបោះឆ្នោតជាផ្លូវការ៕
