តុលាការព្រហ្មទណ្ឌអន្តរជាតិ (ICC) បានបញ្ជាឱ្យក្រុមអ្នកជំនាញវេជ្ជសាស្ត្រធ្វើការវាយតម្លៃថ្មីលើអតីតប្រធានាធិបតីហ្វីលីពីន លោកRodrigo Duterte ដើម្បីកំណត់ថាតើលោកមានសមត្ថភាពគ្រប់គ្រាន់ក្នុងការចូលរួមសវនាការលើសំណុំរឿងឧក្រិដ្ឋកម្មប្រឆាំងមនុស្សជាតិដែរឬទេ។
ប្រភពពីសារព័ត៌មានTRT World នៅថ្ងៃទី១៤ខែមិថុនា។
ក្រុមអ្នកជំនាញ៣នាក់ដែលមានជំនាញផ្នែកចិត្តសាស្ត្រ សរសៃប្រសាទមនុស្សចាស់ និងចិត្តវិទ្យាសរសៃប្រសាទ នឹងពិនិត្យស្ថានភាពសុខភាពផ្លូវចិត្ត និងការយល់ដឹងរបស់លោក Duterte។
ការវាយតម្លៃនេះមានគោលបំណងបញ្ជាក់ថា លោកអាចយល់ពីបទចោទប្រកាន់ ប្រតិបត្តិការតុលាការ និងភស្តុតាងដែលដាក់ប្រឆាំងនឹងលោកបានដែរឬទេ ហើយថាលោកអាចអនុវត្តសិទ្ធិការពារខ្លួនបានពេញលេញក្នុងអំឡុងការជំនុំជម្រះឬអត់។
សូមបញ្ជាក់ថា៖ លោក Duterte កំពុងប្រឈមនឹងការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ពាក់ព័ន្ធនឹងយុទ្ធនាការបង្ក្រាបគ្រឿងញៀនក្នុងអំឡុងពេលលោកកាន់តំណែងជាប្រធានាធិបតីហ្វីលីពីន៕
