(ស្វាយរៀង)៖ នៅព្រឹកថ្ងៃទី១ ខែកក្កដា ឆ្នាំ២០២៦ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញជាអធិបតីប្រារព្ធទិវាមច្ឆជាតិ និងលែងកូនត្រី១.៥លានក្បាល ចូលទន្លេវ៉ៃគោ ស្ថិតក្នុងក្រុងស្វាយរៀង ខេត្តស្វាយរៀង។
ចាប់តាំងពីឆ្នាំ២០០៣.ទិវាមច្ឆជាតិ១ កក្កដា ត្រូវបានរៀបចំឡើងជារៀងរាល់ឆ្នាំក្នុងគោលបំណងផ្សព្វផ្សាយនិងបំផុសស្មារតីឱ្យប្រជាពលរដ្ឋនៅទូទាំងប្រទេសចូលរួមអភិរក្ស និងអភិវឌ្ឍធនធានជលផលប្រកបដោយនិរន្តរភាព សំដៅបង្កើនផលស្តុកមច្ឆជាតិ បំពេញសេចក្តីត្រូវការអាហារមូលដ្ឋានប្រចាំថ្ងៃ ធានាសន្តិសុខស្បៀង និងជួយទ្រទ្រង់ជីវភាពប្រជាពលរដ្ឋ។
ជារៀងរាល់ឆ្នាំ ត្រីមេពូជ កូនត្រី និងវារីសត្វពូជក្នុងស្រុកប្រមាណ ៥លានក្បាល ត្រូវបានលែងចូលទៅក្នុងដែនទឹកធម្មជាតិ។
ទិវាមច្ឆជាតិដែលប្រារព្ធឡើងនៅបឹងទន្លេវ៉ៃគោ នាព្រឹកថ្ងៃទី១នេះ ត្រីមេពូជ កូនត្រី និងវារីសត្វសរុបជាង ២០ប្រភេទ ប្រមាណ១,៥លានក្បាល មានដូចជា បង្កង ត្រីគល់រាំង ត្រីរាជ ត្រីខ្ជឹង ត្រីដំរី ត្រីគ្រំ ត្រីត្រសក់ ត្រីកាហែ ត្រីឆ្ពិន ត្រីប្រា ត្រីពោ ត្រីក្រាញ់ ត្រីអណ្តែងទន់ ត្រីព្រលូង ត្រីកន្ធរ ត្រីសណ្តាយ និងត្រីផ្សេងៗ។
រីឯប្រភេទវារីសត្វផ្សេងទៀតមានដូចជា៖ អណ្តើក២០ក្បាល.កន្ធាយ ១០គីឡូក្រាម អន្ទង់២០គីឡូក្រាមខ្យង ១៥គីឡូក្រាម និងគ្រំ២០គីឡូក្រាម។
អាងទន្លេវ៉ៃគោមានទំហំ១.៦៨៦ហិកតានៅរដូវវស្សា អាចស្តុកទឹកបាន ៣០លានម៉ែត្រគូប និងមានទំហំ១.៣៥០ហិកតានៅរដូវប្រាំង អាចស្តុកទឹកបាន ១៥លានម៉ែត្រគូប។
ទន្លេវ៉ៃគោនៅតែរក្សាបាននូវតួនាទីដ៏សំខាន់ សម្រាប់ជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋ ក្នុងការនេសាទ និងធ្វើស្រែចំការ៕
