(ភ្នំពេញ)៖ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន កាលពីព្រឹកព្រឹកថ្ងៃទី១២ ខែសីហា ឆ្នាំ២០២៦ បានអញ្ជើញ ដឹកនាំកិច្ចប្រជុំស្តីពី«ការកំណត់មុខតំណែងនិងការពិពណ៌នាមុខតំណែង»ដើម្បីធ្វើឱ្យមុខងារ ភារកិច្ចនិងការទទួលខុសត្រូវរបស់មន្ត្រីរាជការ កាន់តែច្បាស់លាស់ និងបង្កើនប្រសិទ្ធភាព។
ឯកឧត្តម នេត្រ ភក្ត្រា បានសង្កត់ធ្ងន់លើសារៈសំខាន់ នៃការកំណត់មុខតំណែង និងការពិពណ៌នាមុខតំណែងឱ្យបានច្បាស់លាស់ ដើម្បីឱ្យមន្ត្រីគ្រប់រូបយល់ច្បាស់ពីតួនាទី ភារកិច្ច សិទ្ធិអំណាច និងការទទួលខុសត្រូវរបស់ខ្លួន ស្របតាមរចនាសម្ព័ន្ធ និងមុខងារថ្មីរបស់ក្រសួង។
ឯកឧត្តម បានបន្តថា ការកំណត់មុខតំណែង និងពិពណ៌នាមុខតំណែង មិនមែនគ្រាន់តែជាការរៀបចំឯកសាររដ្ឋបាលប៉ុណ្ណោះទេ។
ប៉ុន្តែជាមូលដ្ឋានសម្រាប់រៀបចំរចនាសម្ព័ន្ធការងារ ការបែងចែកភារកិច្ច និងការប្រើប្រាស់ធនធានមនុស្សឱ្យចំគោលដៅ។
តាមរយៈការកំណត់តួនាទី និងភារកិច្ចឱ្យបានច្បាស់លាស់ នឹងជួយកាត់បន្ថយការត្រួតស៊ីគ្នានៃការងារ បង្កើនការទទួលខុសត្រូវ និងជំរុញប្រសិទ្ធភាពក្នុងការបំពេញការងាររបស់មន្ត្រីរាជការ។
ឯកឧត្តម នេត្រ ភក្ត្រា លើកឡើងថា ក្នុងបរិបទថ្មីនៃការកែទម្រង់ ក្រសួងព័ត៌មានត្រូវបន្តពង្រឹងសមត្ថភាពស្ថាប័ន និងធនធានមនុស្ស ដើម្បីឆ្លើយតបទៅនឹងការវិវត្តយ៉ាងឆាប់រហ័សនៃវិស័យព័ត៌មាន និងសោតទស្សន៍ ព្រមទាំងការរីកចម្រើននៃបច្ចេកវិទ្យាឌីជីថល និងបញ្ញាសិប្បនិម្មិត។
បើតាមលោក រស់ ថាន់សន រដ្ឋលេខាធិការ និងជាប្រធានក្រុមការងារកែទម្រង់រដ្ឋបាលសាធារណៈក្រសួងព័ត៌មាន បានលើកឡើងថា ការវិភាគ និងកំណត់មុខតំណែងមន្ត្រីរាជការក្រសួងព័ត៌មាន គឺជាកិច្ចការដ៏សំខាន់ ដើម្បីធានាឱ្យការបែងចែកតួនាទី ភារកិច្ច និងការទទួលខុសត្រូវរបស់មន្ត្រីមានភាពច្បាស់លាស់ និងស្របតាមមុខងាររបស់អង្គភាព។
ឯកឧត្តម បញ្ជាក់ថា ការងារនេះក៏ជាផ្នែកមួយនៃការកែទម្រង់រដ្ឋបាលសាធារណៈ ក្នុងគោលបំណងពង្រឹងប្រសិទ្ធភាព ស័ក្តិសិទ្ធភាព និងគុណភាពនៃការបំពេញការងារ ព្រមទាំងធានាឱ្យមន្ត្រីគ្រប់រូបមានការទទួលខុសត្រូវច្បាស់លាស់តាមមុខតំណែងរបស់ខ្លួន។
ការកំណត់មុខតំណែង និងពិពណ៌នាមុខតំណែង»ត្រូវធ្វើឡើងដោយមានការចូលរួមពីអង្គភាពពាក់ព័ន្ធ និងផ្អែកលើស្ថានភាពការងារជាក់ស្តែង ដើម្បីធានាថា មុខតំណែងនីមួយៗមានតម្លៃ និងតួនាទីច្បាស់លាស់ មិនមានភាពស្ទួនគ្នា និងអាចវាស់វែងលទ្ធផលការងារបាន៕
