ប្រេងឆៅពីនាវាដឹកប្រេងដែលកំពុងលេចធ្លាយ បានចាប់ផ្តើមហូរមកដល់ឆ្នេរសមុទ្រប្រទេសអូម៉ង់។ អាជ្ញាធរបរិស្ថានអូម៉ង់បានព្រមានថា ការលេចធ្លាយនេះអាចក្លាយជាគ្រោះមហន្តរាយប្រេងដ៏ធំបំផុតមួយក្នុងរយៈពេលប៉ុន្មានឆ្នាំចុងក្រោយ។
ប្រភពពីសារព័ត៌មានReuter នៅថ្ងៃទី១៣ខែសីហា។
តាមការវិភាគរូបភាពផ្កាយរណប ប្រេងដែលហូរចេញពីនាវាបានរីកសាយលើផ្ទៃសមុទ្រជាង ២,០០០ គីឡូម៉ែត្រការ៉េ ហើយបានបន្តរីកធំឡើងចាប់តាំងពីចុងខែកក្កដា។
អាជ្ញាធរបានបញ្ជាក់ថា ប្រេងអាចប៉ះពាល់ដល់ឆ្នេរប្រវែងប្រមាណ ៤០ គីឡូម៉ែត្រ នៅតំបន់ Ras Madraka និងអាចទៅដល់ កោះ Masirah ផងដែរ។ ការលេចធ្លាយនេះអាចបង្កការខូចខាតធ្ងន់ធ្ងរដល់បរិស្ថាន សត្វសមុទ្រ និងតំបន់ឆ្នេរ។
អង្គការសមុទ្រអន្តរជាតិរបស់អង្គការសហប្រជាជាតិ (IMO) បាននិយាយថា ខ្លួនកំពុងរៀបចំផែនការឆ្លើយតប ដើម្បីទប់ស្កាត់ការរីករាលដាល និងកាត់បន្ថយផលប៉ះពាល់៕
