សហរដ្ឋអាមេរិកបានផ្ញើសារដែលមានសម្លេងខ្លាំងទៅកាន់អ៊ីស្រាអែល និងទាមទារឱ្យរដ្ឋាភិបាលអ៊ីស្រាអែលបំភ្លឺអំពីអំពើហិង្សាដែលបានកើតឡើងនៅតំបន់ Qusra ជិតទីក្រុង Nablus ក្នុងតំបន់ West Bank ដែលស្ថិតក្រោមការកាន់កាប់របស់អ៊ីស្រាអែល។
ប្រភពពីសារព័ត៌មានAnadolu Agency នៅថ្ងៃទី១៣ខែសីហា។
តាមសារព័ត៌មានអ៊ីស្រាអែល Yedioth Ahronoth មន្ត្រីអាមេរិកបានប្រាប់មន្ត្រីអ៊ីស្រាអែលថា ពួកគេមានការភ្ញាក់ផ្អើលចំពោះហេតុការណ៍នេះ និងចង់ដឹងថា ហេតុអ្វីកងទ័ពអ៊ីស្រាអែលមិនបានរារាំងការវាយប្រហារលើជនជាតិប៉ាឡេស្ទីន។
មន្ត្រីអាមេរិកក៏បានចោទសួរយ៉ាងធ្ងន់ថា តើមានភាព អសណ្តាប់ធ្នាប់នៅក្នុងប្រទេសអ៊ីស្រាអែល ឬយ៉ាងណា ហើយហេតុអ្វីបានជាកងទ័ពមិនអាចការពារប្រជាជនប៉ាឡេស្ទីនពីអំពើហិង្សា។
ករណីនេះកើតឡើង ខណៈគ្រួសារប៉ាឡេស្ទីនចំនួនពីរគ្រួសារត្រូវបានឡោមព័ទ្ធនៅក្នុងផ្ទះរបស់ពួកគេនៅ West Bank ចាប់តាំងពីថ្ងៃអាទិត្យ។ គ្រួសារទាំងនោះបានរាយការណ៍ថា អាហារ និងសម្ភារៈចាំបាច់កំពុងខ្វះខាត ខណៈក្រុមសិទ្ធិមនុស្សបានអំពាវនាវឱ្យអាជ្ញាធរចូលមកជួយអន្តរាគមន៍៕
