អត្រាអ្នកគ្មានការងារធ្វើនៅប្រទេសឥណ្ឌា សម្រាប់ប្រជាជនអាយុចាប់ពី១៥ឆ្នាំឡើងទៅ បានធ្លាក់ចុះមកនៅត្រឹម៥.១% ក្នុងខែកក្កដា ដែលជាកម្រិតទាបបំផុតក្នុងរយៈពេល៤ខែ។
ប្រភពពីសារព័ត៌មានReuter នៅថ្ងៃទី១៨ខែសីហា។
ទិន្នន័យរបស់ការិយាល័យស្ថិតិជាតិឥណ្ឌា បង្ហាញថា អត្រាអ្នកគ្មានការងារធ្វើនៅតំបន់ជនបទ បានធ្លាក់ពី ៥.០% ក្នុងខែមិថុនា មកនៅ ៤.៥% ក្នុងខែកក្កដា។ ចំណែកនៅទីក្រុងវិញ អត្រានេះបានកើនបន្តិចពី ៦.៦% ទៅ ៦.៧%។
លទ្ធផលនេះល្អជាងការរំពឹងទុករបស់អ្នកវិភាគ ដែលបានព្យាករណ៍ថា អត្រាអ្នកគ្មានការងារធ្វើក្នុងខែកក្កដា នឹងស្ថិតនៅប្រហែល ៥.៤% ខណៈខែមិថុនា មាន ៥.៥%។
ការធ្លាក់ចុះនៃអត្រាគ្មានការងារធ្វើ ជាពិសេសនៅតំបន់ជនបទ បង្ហាញថា ឱកាសការងារនៅឥណ្ឌាមានភាពប្រសើរឡើងបន្តិច បើទោះបីទីផ្សារការងារនៅតំបន់ទីក្រុងនៅតែមានសម្ពាធក៏ដោយ៕
