ទឹកជំនន់ភ្លាមៗនិងលំហូរភក់ដ៏ធ្ងន់ធ្ងរនៅតំបន់ភាគខាងជើងនៃប្រទេសនេប៉ាល់ ក្បែរព្រំដែនចិន បានបណ្តាលឱ្យមនុស្សជាង ៣៥០នាក់ស្លាប់ និងប្រមាណ១,០០០នាក់នៅតែបាត់ខ្លួន ខណៈក្រុមសង្គ្រោះកំពុងបន្តស្វែងរកអ្នកនៅរស់។
ប្រភពពីសារព័ត៌មានReuter នៅថ្ងៃទី២៧ខែសីហា។
ក្នុងចំណោមអ្នកបាត់ខ្លួន មានអ្នកទេសចរបរទេសប្រមាណ ៧០០នាក់ ដែលបានធ្វើដំណើរតាមផ្លូវមួយដែលមានអ្នកដើរទេសចរណ៍ និងអ្នកធ្វើធម្មយាត្រាច្រើន។ ប្រទេសឥណ្ឌាបានរាយការណ៍ថា ពលរដ្ឋរបស់ខ្លួនយ៉ាងហោចណាស់២៨៨នាក់កំពុងបាត់ខ្លួន។
ក្រុមអ្នកជំនាញជឿថា គ្រោះមហន្តរាយនេះអាចត្រូវបានបង្កឡើងដោយ ការបាក់រលំផ្ទាំងទឹកកក ដែលបង្កឱ្យមានទឹក និងភក់ហូរយ៉ាងខ្លាំងចុះតាមជ្រលងភ្នំ បំផ្លាញផ្ទះ អគារ និងផ្លូវជាច្រើន។
ក្រុមជួយសង្គ្រោះកំពុងប្រើឧទ្ធម្ភាគចក្រ ដើម្បីស្វែងរកអ្នកបាត់ខ្លួន និងបញ្ជូនតង់ អាហារ និងសម្ភារៈបន្ទាន់ទៅកាន់តំបន់ដែលត្រូវបានកាត់ផ្តាច់ពីពិភពខាងក្រៅ៕
