សហរដ្ឋអាមេរិកនិងកាណាដា បានប្រកាសត្រៀមផ្តល់ជំនួយសង្គ្រោះបន្ទាន់ដល់ប្រទេសនេប៉ាល់ បន្ទាប់ពីទឹកជំនន់ភ្លាមៗ និងការរអិលបាក់ភក់ដ៏ធ្ងន់ធ្ងរ បានវាយប្រហារតំបន់ក្បែរព្រំដែនចិន។
ប្រភពពីសារព័ត៌មានAnadolu Agency នៅថ្ងៃទី២៧ខែសីហា។
រដ្ឋមន្ត្រីការបរទេសអាមេរិក លោកMarco Rubio បានបញ្ជាក់ថា សហរដ្ឋអាមេរិកត្រៀមគាំទ្ររដ្ឋាភិបាលនេប៉ាល់ជាមួយជំនួយមនុស្សធម៌ដែលចាំបាច់។ ចំណែកនាយករដ្ឋមន្ត្រីកាណាដា លោកMark Carney បានហៅគ្រោះមហន្តរាយនេះថាបំផ្លិចបំផ្លាញយ៉ាងខ្លាំងនិងបញ្ជាក់ថា កាណាដាត្រៀមផ្តល់ការគាំទ្រដល់នេប៉ាល់។
តាមអាជ្ញាធរនេប៉ាល់ មានពលរដ្ឋអាមេរិកយ៉ាងហោចណាស់ ៤៧ នាក់ និងពលរដ្ឋកាណាដា ២៤ នាក់ ស្ថិតក្នុងចំណោមអ្នកបាត់ខ្លួន។ ទោះជាយ៉ាងណា សហរដ្ឋអាមេរិក និងកាណាដាមិនទាន់បញ្ជាក់ដោយឯករាជ្យពីតួលេខទាំងនេះនៅឡើយទេ។
អាជ្ញាធរនេប៉ាល់ និងក្រុមសង្គ្រោះកំពុងបន្តស្វែងរកអ្នកបាត់ខ្លួន និងជួយប្រជាជនដែលរងផលប៉ះពាល់ ខណៈសហគមន៍អន្តរជាតិកំពុងត្រៀមជួយដល់ប្រទេសនេប៉ាល់ក្នុងការឆ្លើយតបនឹងគ្រោះមហន្តរាយនេះ៕
