វេជ្ជបណ្ឌិតលោកHussam Abu Safiya អតីតនាយកមន្ទីរពេទ្យKamal Adwan នៅភាគខាងជើងតំបន់ហ្គាហ្សា បានអះអាងថា លោកនៅតែត្រូវឆ្មាំពន្ធនាគារអ៊ីស្រាអែលវាយដំ គំរាមកំហែង ដើម្បីមិនឱ្យលោកប្រាប់មេធាវីអំពីស្ថានភាពនៃការឃុំខ្លួន។
ប្រភពពីសារព័ត៌មានAnadolu Agency នៅថ្ងៃទី៣ខែកញ្ញា។
តាមរយៈមេធាវីរបស់លោកAbu Safiya បានប្រាប់ថា ឆ្មាំពន្ធនាគារបានវាយ និងទាត់លោក ព្រមទាំងប្រើដំបងវាយលើរាងកាយ។ លោកក៏អះអាងថា ត្រូវបានរំខានដំណេកពេញមួយយប់ដោយសំឡេងខ្លាំង និងឧបករណ៍បំពងសំឡេង។
លោក Abu Safiya ត្រូវបានអ៊ីស្រាអែលឃុំខ្លួនតាំងពីខែធ្នូ ឆ្នាំ២០២៤ ដោយមិនទាន់មានការចោទប្រកាន់ ឬកាត់ទោស។ មេធាវីរបស់លោកក៏បាននិយាយថា លោកត្រូវបានគំរាមកុំឱ្យនិយាយអំពីការប្រព្រឹត្តចំពោះលោកក្នុងពន្ធនាគារ។
អង្គការ Physicians for Human Rights Israel កំពុងទាមទារឱ្យអនុញ្ញាតឱ្យវេជ្ជបណ្ឌិតឯករាជ្យចូលពិនិត្យសុខភាពលោក។ តាមកំណត់ត្រាវេជ្ជសាស្ត្រ លោកមានរបួសនៅភ្នែកខាងឆ្វេង ហើយបានត្អូញត្អែរពីរបួសនៅក្បាល និងទ្រូង។
ក្នុងពេលជាមួយគ្នា តុលាការកំពូលអ៊ីស្រាអែលបានទាមទារឱ្យអាជ្ញាធរបញ្ជាក់ជំហររបស់ខ្លួនចំពោះសំណើដោះលែងវេជ្ជបណ្ឌិតប៉ាឡេស្ទីន ១៤នាក់ ដែលកំពុងត្រូវបានឃុំខ្លួនដោយគ្មានការចោទប្រកាន់ ឬកាត់ទោស។
អង្គការសិទ្ធិមនុស្សបានអំពាវនាវឱ្យមានការពិនិត្យសុខភាពដោយឯករាជ្យ និងឱ្យអាជ្ញាធរដោះស្រាយបញ្ហាសុខភាព និងសុវត្ថិភាពរបស់វេជ្ជបណ្ឌិតដែលកំពុងជាប់ឃុំ៕
