ប្រធានាធិបតីអ៊ុយក្រែន លោកVolodymyr Zelenskyy បាននិយាយថា កាណាដាត្រៀមចូលរួមកម្មវិធីការពារមីស៊ីលFREYJAរបស់អឺរ៉ុប និងនឹងផ្តល់មីស៊ីលស្ទាក់ការពារដែនអាកាសមានតម្លៃប្រហែល២៥៣លានដុល្លារអាមេរិក ដល់អ៊ុយក្រែន។
ប្រភពពីសារព័ត៌មានAnadolu Agency នៅថ្ងៃទី១១ខែកញ្ញា។
ការប្រកាសនេះធ្វើឡើងបន្ទាប់ពី Zelenskyy ជួបនាយករដ្ឋមន្ត្រីកាណាដា Mark Carney នៅទីក្រុង Calgary ដើម្បីពិភាក្សាអំពីការជួយអ៊ុយក្រែនក្នុងរដូវរងារ ថាមពល ការពារដែនអាកាស និងកិច្ចសហប្រតិបត្តិការផ្នែកការពារជាតិ។
មេដឹកនាំទាំងពីរក៏បានចុះហត្ថលេខាលើ សេចក្តីប្រកាសស្តីពីភាពជាដៃគូរយៈពេល ១០០ឆ្នាំ។ Zelenskyy បាននិយាយថា កិច្ចព្រមព្រៀងនានាដែលសម្រេចបានក្នុងដំណើរទស្សនកិច្ចនេះ មានតម្លៃសរុប ជាង ២ពាន់លានដុល្លារ។
កាណាដាក៏កំពុងរៀបចំ ទណ្ឌកម្មថ្មីប្រឆាំងរុស្ស៊ី ដើម្បីធ្វើឱ្យរុស្ស៊ីពិបាកផលិតមីស៊ីលផ្លោង។ ប្រទេសទាំងពីរក៏កំពុងចរចាលើកិច្ចព្រមព្រៀងផលិត ឬផ្គត់ផ្គង់យន្តហោះដ្រូនសម្រាប់អ៊ុយក្រែនផងដែរ។
ចំពោះការចរចាសន្តិភាពជាមួយរុស្ស៊ី Zelenskyy រំពឹងថា លទ្ធផលដំបូងអាចលេចចេញនៅចុងខែកញ្ញា។ អ៊ុយក្រែនគ្រោងជួបមន្ត្រីអាមេរិកនៅទីក្រុងញូវយ៉កនៅចុងខែនេះ ដើម្បីពិភាក្សាអំពីថាមពល និងសន្តិសុខស្បៀងអាហារ។
លោកZelenskyy ក៏បានបញ្ជាក់ថា អ៊ុយក្រែននៅតែពឹងផ្អែកលើការគាំទ្ររបស់អាមេរិក ជាពិសេស ប្រព័ន្ធការពារដែនអាកាស Patriot និងមីស៊ីល Patriot ព្រមទាំងព័ត៌មានស៊ើបការណ៍ពីអាមេរិក និងអឺរ៉ុប៕
