អាជ្ញាធរហ្វីលីពីនកំពុងបន្តប្រតិបត្តិការស្វែងរកនិងជួយសង្គ្រោះមនុស្ស៨៤នាក់ដែលនៅតែបាត់ខ្លួន បន្ទាប់ពីកាណូតដឹកអ្នកដំណើរMV June Aster បានឆេះនៅតំបន់សមុទ្រក្បែរខេត្តPalawan កាលពីយប់ថ្ងៃពុធ។
ប្រភពពីសារព័ត៌មានAnadolu Agency នៅថ្ងៃទី១១ខែកញ្ញា។
កាណូតនេះបានធ្វើដំណើរពីទីក្រុងម៉ានីល ទៅកាន់ទីក្រុង Coron ក្នុងខេត្ត Palawan។ តាមបញ្ជីអ្នកដំណើរ និងនាវិក មានមនុស្សសរុប ១៣៤នាក់ ក្នុងនោះអ្នកដំណើរ ១១៧នាក់ និងនាវិក ១៧នាក់។
រហូតមកដល់ពេលនេះមនុស្ស៤៣នាក់ត្រូវបានជួយសង្គ្រោះ និង ៥នាក់បានស្លាប់។ អាជ្ញាធរបានកែសម្រួលចំនួនអ្នកបាត់ខ្លួនពី ៨៦នាក់ មកនៅ ៨៤នាក់ បន្ទាប់ពីរកឃើញថាមនុស្សពីរនាក់ដែលមានឈ្មោះក្នុងបញ្ជី មិនបានឡើងលើកាណូតនោះទេ។
ប្រធានប៉ូលិសជាតិហ្វីលីពីន លោក Jose Melencio Nartatez បានបញ្ជាឱ្យបង្កើនកម្លាំងស្វែងរក និងសង្គ្រោះ ដោយសារពេលវេលាមានសារៈសំខាន់ខ្លាំង។ អាជ្ញាធរក៏កំពុងស៊ើបអង្កេតរកមូលហេតុនៃអគ្គិភ័យ និងកំណត់ថា តើមានអ្នកណាត្រូវទទួលខុសត្រូវចំពោះហេតុការណ៍នេះឬយ៉ាងណា។
សាកសពអ្នកស្លាប់ទាំង៥នាក់ក៏កំពុងត្រូវបានកំណត់អត្តសញ្ញាណ ដើម្បីប្រគល់ជូនក្រុមគ្រួសាររបស់ពួកគេ៕
