កងកម្លាំងរដ្ឋាភិបាលយេម៉ែនបានប្រកាសថា ខ្លួនបានដណ្តើមយក ទីតាំងសំខាន់ចំនួន២មកវិញ ពីក្រុមហ៊ូធីបន្ទាប់ពីមានការប្រយុទ្ធគ្នានៅតំបន់ព្រំប្រទល់រវាងខេត្ត Taiz និង Lahj។
ប្រភពពីសារព័ត៌មានAA news នៅថ្ងៃទី១៩ខែកញ្ញា។
មន្ត្រីក្រសួងព័ត៌មានយេម៉ែន លោក Fayyad al-Numan បាននិយាយថា កងកម្លាំងរដ្ឋាភិបាល និងក្រុមអ្នកប្រយុទ្ធគាំទ្ររដ្ឋាភិបាល បានដណ្តើមបាន ភ្នំ Al-Bazla និងតំបន់ Madkhula បន្ទាប់ពីការប្រយុទ្ធយ៉ាងខ្លាំងជាមួយក្រុមហ៊ូធី។
លោកបន្ថែមថា កងកម្លាំងរដ្ឋាភិបាលក៏បានវាយប្រហារលើ ទីតាំង និងយានយន្តយោធារបស់ក្រុមហ៊ូធី នៅតំបន់ផ្សេងទៀតផងដែរ។ ប៉ុន្តែ ក្រុមហ៊ូធីមិនទាន់មានប្រតិកម្មចំពោះការអះអាងនេះទេ។
ការប្រយុទ្ធនៅយេម៉ែនបានកើនឡើងខ្លាំងក្នុងខែកញ្ញា ជាពិសេសនៅតំបន់ឆ្នេរខាងលិច និងជុំវិញ ច្រកសមុទ្រ Bab el-Mandeb ដែលជាផ្លូវសមុទ្រសំខាន់សម្រាប់ការដឹកជញ្ជូនអន្តរជាតិ។
សង្គ្រាមនៅយេម៉ែនបានចាប់ផ្តើមតាំងពីឆ្នាំ ២០១៤ បន្ទាប់ពីក្រុមហ៊ូធីដណ្តើមកាន់កាប់រដ្ឋធានី Sanaa និងតំបន់ជាច្រើនរបស់ប្រទេស៕
