តុលាការនៅរដ្ឋ Vermont របស់សហរដ្ឋអាមេរិក បានរកឃើញថា លោកJason Eaton អាយុ ៥១ឆ្នាំ មានទោសពីបទប៉ុនប៉ងសម្លាប់ បន្ទាប់ពីគាត់បានបាញ់និស្សិតប៉ាឡេស្ទីន៣នាក់ នៅក្បែរសាកលវិទ្យាល័យ Vermont ក្នុងទីក្រុង Burlington កាលពីខែវិច្ឆិកា ឆ្នាំ២០២៣។
ប្រភពពីសារព័ត៌មានAA news នៅថ្ងៃទី២២ខែកញ្ញា។
ការបាញ់ប្រហារនេះបានធ្វើឱ្យ Hisham Awartani ពិការពីចង្កេះចុះក្រោម និងធ្វើឱ្យមិត្តរបស់គេគឺ Tahseen Aliahmad និង Kinnan Abdalhamid រងរបួស។
Eaton មិនបានបដិសេធថា ខ្លួនជាអ្នកបាញ់ទេ ប៉ុន្តែបានអះអាងថា ស្ថានភាពផ្លូវចិត្តរបស់គាត់ធ្វើឱ្យគាត់មិនអាចទទួលខុសត្រូវចំពោះទង្វើរបស់ខ្លួនបាន។ គណៈវិនិច្ឆ័យបានបដិសេធការការពារតាមហេតុផលវិកលចរិតនេះ។
លោកEaton អាចប្រឈមនឹង ទោសជាប់ពន្ធនាគាររហូតដល់អស់មួយជីវិត ហើយបច្ចុប្បន្នត្រូវបានឃុំខ្លួនរង់ចាំការកំណត់ទោស។
គ្រួសាររបស់ជនរងគ្រោះបានស្វាគមន៍សាលក្រម ដោយនិយាយថា វាមិនអាចលុបបំបាត់ការឈឺចាប់ និងរបួសផ្លូវចិត្តរបស់កូនៗពួកគេបានទេ ប៉ុន្តែបញ្ជាក់ថា Eaton ត្រូវទទួលខុសត្រូវចំពោះអំពើរបស់ខ្លួន។ ពួកគេក៏បានចាត់ទុកការវាយប្រហារនេះថា ជាឧក្រិដ្ឋកម្មដោយសារការស្អប់ខ្ពើម៕
