គណៈកម្មការប៉ាឡេស្ទីនបានព្រមានថា អ៊ីស្រាអែលគ្រោងបើកផ្លូវ Route 463 ឡើងវិញសម្រាប់អ្នកតាំងទីលំនៅអ៊ីស្រាអែល នៅតំបន់ Ramallah ក្នុងតំបន់West Bank។
ប្រភពពីសារព័ត៌មានAA news នៅថ្ងៃទី៣០ខែកញ្ញា។
គណៈកម្មការនិយាយថា ប្រសិនបើផ្លូវនេះបើកឡើងវិញ វាអាចធ្វើឱ្យភូមិប៉ាឡេស្ទីនចំនួន ៨ និងតំបន់លំនៅដ្ឋានធំៗ ២ នៅភាគខាងជើង ត្រូវផ្តាច់ពីតំបន់ភាគខាងត្បូង។
ប្រជាជនប៉ាឡេស្ទីនរាប់ម៉ឺននាក់អាចត្រូវប្រើផ្លូវចាស់មួយជំនួសវិញ ប៉ុន្តែផ្លូវនោះមានការកកស្ទះចរាចរណ៍ខ្លាំងរួចទៅហើយ។ នេះអាចធ្វើឱ្យការធ្វើដំណើររបស់ប្រជាជនកាន់តែលំបាក។
គណៈកម្មការប៉ាឡេស្ទីនចាត់ទុកផែនការនេះថា ជាផ្នែកមួយនៃការផ្លាស់ប្តូរដែលអាចធ្វើឱ្យតំបន់ប៉ាឡេស្ទីននៅ Ramallah និង Al-Bireh កាន់តែបែកខ្ញែក។
សូមបញ្ជាក់ថា៖ ផ្លូវ Route 463 ត្រូវបានសាងសង់ក្នុងឆ្នាំ ១៩៩៤ ហើយផ្នែកខ្លះត្រូវបានបិទតាំងពីឆ្នាំ ២០០០ ដោយសារហេតុផលសន្តិសុខ។ ចាប់ពីឆ្នាំ ២០២៣ ការបិទផ្លូវ និងច្រកយោធាជាច្រើនក៏បានធ្វើឱ្យការធ្វើដំណើររបស់ប្រជាជនប៉ាឡេស្ទីនកាន់តែពិបាកផងដែរ៕
