កាលពីថ្ងៃទី៤ ខែតុលា ឆ្នាំ២០២៦ ប្រធានាធិបតីកូរ៉េខាងត្បូង លោក Lee Jae Myung បានបញ្ជាឱ្យមានការស៊ើបអង្កេតយ៉ាងលម្អិត និងចាត់វិធានការឆ្លើយតបចំពោះករណីលេចធ្លាយទិន្នន័យផ្ទាល់ខ្លួននៅធនាគារ ក្រុមហ៊ុនហិរញ្ញវត្ថុ និងស្ថាប័នរដ្ឋ។
ប្រភពពីសារព័ត៌មានReuter។
អាជ្ញាធរហិរញ្ញវត្ថុបានបើកកិច្ចប្រជុំបន្ទាន់ជាមួយធនាគារ និងស្ថាប័នពាក់ព័ន្ធ បន្ទាប់ពីធនាគារជាច្រើន ដូចជា Shinhan Bank, KB Kookmin Bank, Hana Bank និង Woori Bank រងការវាយប្រហារតាមប្រព័ន្ធអ៊ីនធឺណិត។
អាជ្ញាធរបាននិយាយថា មិនអាចបដិសេធបានទេថា បញ្ញាសិប្បនិម្មិត (AI) អាចត្រូវបានប្រើក្នុងការវាយប្រហារ។ ដូច្នេះ កូរ៉េខាងត្បូងគ្រោងពង្រឹងប្រព័ន្ធការពារសុវត្ថិភាពតាមអ៊ីនធឺណិត ដោយប្រើ AI ដើម្បីទប់ស្កាត់ការវាយប្រហារដែលប្រើ AI។
អាជ្ញាធរក៏បានបញ្ជាឱ្យស្ថាប័នហិរញ្ញវត្ថុពិនិត្យប្រព័ន្ធសុវត្ថិភាពទាំងមូល កាត់បន្ថយការចូលប្រើប្រព័ន្ធពីខាងក្រៅ និងពង្រឹងការការពារអតិថិជន។ ព័ត៌មានអំពីវិធីវាយប្រហារ និងអាសយដ្ឋាន IP ដែលពាក់ព័ន្ធ នឹងត្រូវចែករំលែករហ័សរវាងស្ថាប័ន ដើម្បីទប់ស្កាត់ការវាយប្រហារថ្មីៗ។
អាជ្ញាធរក៏កំពុងពិនិត្យថា ការវាយប្រហារទាំងនេះអាចពាក់ព័ន្ធនឹង កូរ៉េខាងជើង ឬអត់ ដោយសារកន្លងមកកូរ៉េខាងជើងធ្លាប់ត្រូវបានចោទប្រកាន់ថាពាក់ព័ន្ធនឹងការវាយប្រហារតាមអ៊ីនធឺណិតលើស្ថាប័នហិរញ្ញវត្ថុកូរ៉េខាងត្បូង៕
