កងទ័ពយេម៉ែនអះអាងថា ខ្លួនដណ្តើមបានតំបន់មួយចំនួនមកវិញ នៅខេត្តតាអ៊ីស (Taiz) ភាគនិរតីប្រទេស បន្ទាប់ពីការប្រយុទ្ធគ្នាយ៉ាងខ្លាំងជាមួយក្រុមហ៊ូទី។ ជាមួយគ្នានេះ ក្រសួងការពារជាតិយេម៉ែនបានចោទប្រកាន់ក្រុមហ៊ូទីថា បានបាញ់មីស៊ីលបាលីស្ទិកទៅលើផ្សារមួយ បណ្តាលឱ្យជនស៊ីវិលរាប់សិបនាក់ស្លាប់ និងរងរបួស។
សារព័ត៌មានAnadolu Agency នៅថ្ងៃទី៧ខែវិច្ឆិកា។
កងទ័ពយេម៉ែនបានឱ្យដឹងថា ក្នុងរយៈពេលប៉ុន្មានម៉ោង កងកម្លាំងរបស់ខ្លួនបានវាយប្រហារចំនួន ១.២១១លើក ទៅលើទីតាំង និងកម្លាំងយោធារបស់ក្រុមហ៊ូទី ដោយប្រើយន្តហោះចម្បាំង ដ្រូន កាំភ្លើងធំ និងរ៉ុក្កែត។ កងទ័ពក៏បានអះអាងថា ការវាយប្រហារនេះបានធ្វើឱ្យមេបញ្ជាការ និងយុទ្ធជនហ៊ូទីប្រមាណ ៣៨៧នាក់ស្លាប់ ឬអសមត្ថភាពប្រយុទ្ធ ព្រមទាំងបំផ្លាញ ឬធ្វើឱ្យខូចខាតរថយន្ត និងសម្ភារយោធាចំនួន ៩៦គ្រឿង។
ដោយឡែក ក្រសួងការពារជាតិយេម៉ែនបាននិយាយថា ក្រុមហ៊ូទីបានបាញ់មីស៊ីលទៅលើផ្សារអាល់ហាដារ៉ា (Al-Hadara) ក្នុងស្រុកអាល់វ៉ាហ្ស៊ីយ៉ា ខេត្តតាអ៊ីស កាលពីថ្ងៃសុក្រ បណ្តាលឱ្យជនស៊ីវិលរាប់សិបនាក់ស្លាប់ និងរបួស ប៉ុន្តែមិនបានបញ្ជាក់ចំនួនអ្នកស្លាប់ និងរបួសជាក់លាក់ឡើយ។
ទន្ទឹមនឹងនេះ អង្គការអន្តរជាតិទេសន្តរប្រវេសន៍ (IOM) បានឱ្យដឹងថា គិតត្រឹមថ្ងៃទី៣ ខែវិច្ឆិកា ចំនួនប្រជាជនដែលបានភៀសខ្លួនដោយសារការប្រយុទ្ធគ្នាចាប់តាំងពីថ្ងៃទី១ ខែសីហា បានកើនដល់ ៣០៨.៦៥៣នាក់ ស្មើនឹង ៥១.៤៣៦គ្រួសារ។ ខេត្តតាអ៊ីសមានអ្នកភៀសខ្លួនច្រើនជាងគេ គឺ ១៣៥.៦៤៨នាក់។
យោងតាមរបាយការណ៍អង្គការសហប្រជាជាតិ ការប្រយុទ្ធគ្នាដែលកើនឡើងវិញចាប់តាំងពីខែកក្កដា បានបណ្តាលឱ្យមនុស្សប្រមាណ ១០.០០០នាក់ស្លាប់ និងរងរបួស។ ជម្លោះនៅប្រទេសយេម៉ែនបានអូសបន្លាយតាំងពីឆ្នាំ២០១៤ ហើយការប្រយុទ្ធគ្នាឡើងវិញកំពុងធ្វើឱ្យវិបត្តិមនុស្សធម៌ និងការភៀសខ្លួនកាន់តែធ្ងន់ធ្ងរ៕
