ការគំរាមបំផ្ទុះគ្រាប់បែកនៅតាមស្ថានីយទូរទស្សន៍មួយចំនួននៅអឺរ៉ុប កាលពីថ្ងៃទី៦ ខែវិច្ឆិកា ឆ្នាំ២០២៦ បានបង្កឱ្យមានការជម្លៀសបុគ្គលិក និងផ្អាកការផ្សាយកម្មវិធីមួយចំនួនជាបណ្តោះអាសន្ន។
សារព័ត៌មានReuter។
ការគំរាមកំហែងនេះត្រូវបានផ្ញើតាមអ៊ីមែលទៅកាន់ស្ថានីយទូរទស្សន៍ RTE របស់អៀរឡង់ Sky របស់អង់គ្លេស និង Nova TV របស់ប៊ុលហ្គារី ដោយសារគំរាមថា គ្រាប់បែកនឹងផ្ទុះក្នុងរយៈពេល ៤៥ នាទី និងបានសរសេរថា «ពេលវេលាកំពុងរាប់ថយក្រោយ»។
នៅប្រទេសអៀរឡង់ បុគ្គលិកស្ថានីយទូរទស្សន៍ RTE ត្រូវបានជម្លៀសចេញ ខណៈកម្មវិធីផ្សាយផ្ទាល់ត្រូវបានជំនួសដោយតន្ត្រី និងសារដែលបានថតទុករយៈពេលរហូតដល់ ៣ ម៉ោង។ ចំណែកស្ថានីយ Nova TV នៅប៊ុលហ្គារី ក៏ត្រូវបានត្រួតពិនិត្យដោយប៉ូលិសផងដែរ។
ទោះជាយ៉ាងណា ក្រោយការត្រួតពិនិត្យរបស់សមត្ថកិច្ច មិនមានគ្រាប់បែក ឬវត្ថុផ្ទុះណាមួយត្រូវបានរកឃើញនៅទីតាំងដែលរងការគំរាមកំហែងនោះទេ។
អ៊ីមែលគំរាមកំហែងមួយចំនួនមានចំណងជើងថា «សារទៅកាន់លោកខាងលិច» និងចុះហត្ថលេខាដោយឈ្មោះ Mikhail Andropov ដែលអះអាងថាជាមេដឹកនាំម្នាក់នៃក្រុមដែលពាក់ព័ន្ធនឹងការគំរាមបំផ្ទុះគ្រាប់បែកលើយន្តហោះក្នុងសប្តាហ៍នេះ។ ប៉ុន្តែគេនៅមិនទាន់ដឹងថា អ្នកណាជាអ្នកនៅពីក្រោយសកម្មភាពទាំងនេះ ឬមានការពាក់ព័ន្ធជាមួយរុស្ស៊ីដែរឬយ៉ាងណានោះទេ។
នាយករដ្ឋមន្ត្រីអៀរឡង់ លោក Micheál Martin បានឱ្យដឹងថា ភ្នាក់ងារសន្តិសុខនៅអឺរ៉ុបកំពុងស៊ើបអង្កេត ដើម្បីកំណត់ថា ការគំរាមកំហែងទាំងនេះជាសកម្មភាពរបស់បុគ្គលម្នាក់ៗ ឬជាផែនការវាយប្រហារដែលមានការរៀបចំរួមគ្នា៕
