កងកម្លាំងអ៊ីស្រាអែលបានបិទវិហារអ៊ីប្រាហ៊ីម (Ibrahimi Mosque) ក្នុងទីក្រុងហេប្រុន (Hebron) តំបន់វេសប៊ែង ដែលកាន់កាប់ដោយអ៊ីស្រាអែល ដោយមិនអនុញ្ញាតឱ្យប្រជាជនប៉ាឡេស្ទីនចូលបន់ស្រន់ ដើម្បីរៀបចំពិធីបុណ្យសាសនាជ្វីហ្វ កាលពីថ្ងៃទី៦ ខែវិច្ឆិកា ឆ្នាំ២០២៦។
សារព័ត៌មានAl Jazeera។
ក្រសួងកិច្ចការសាសនាប៉ាឡេស្ទីនបានឱ្យដឹងថា អ្នកបន់ស្រន់ និងបុគ្គលិកវិហារត្រូវបានហាមឃាត់មិនឱ្យចូល ខណៈការអំពាវនាវឱ្យប្រជាជនចូលបន់ស្រន់ក៏ត្រូវបានផ្អាកផងដែរ។ អាជ្ញាធរអ៊ីស្រាអែលមានគម្រោងបើកវិហារនេះឱ្យជនជាតិអ៊ីស្រាអែលប្រើប្រាស់ផ្តាច់មុខ រហូតដល់ម៉ោង១០យប់ ថ្ងៃទី៧ ខែវិច្ឆិកា។
ក្នុងអំឡុងពេលនេះ កងកម្លាំងអ៊ីស្រាអែលបានរឹតបន្តឹងការត្រួតពិនិត្យ និងកម្រិតការធ្វើដំណើររបស់ប្រជាជននៅតំបន់ទីក្រុងចាស់នៃទីក្រុងហេប្រុន។ អ៊ីស្រាអែលរំពឹងថា នឹងមានអ្នកទស្សនាប្រមាណ ២០.០០០នាក់ ចូលរួមពិធីបុណ្យនេះ ដោយមានកងកម្លាំងសន្តិសុខរាប់រយនាក់ដាក់ពង្រាយការពារ។
វិហារអ៊ីប្រាហ៊ីម គឺជាទីសក្ការៈដ៏សំខាន់សម្រាប់ទាំងសាសនាអ៊ីស្លាម និងសាសនាជ្វីហ្វ ដោយជឿថាជាទីបញ្ចុះសពព្យាការីអាប្រាហាំ និងសមាជិកគ្រួសាររបស់លោក។
យោងតាមកិច្ចព្រមព្រៀងហេប្រុនឆ្នាំ១៩៩៧ អ៊ីស្រាអែលទទួលខុសត្រូវផ្នែកសន្តិសុខនៅតំបន់ទីក្រុងចាស់ ខណៈអាជ្ញាធរប៉ាឡេស្ទីនមានសិទ្ធិគ្រប់គ្រងផែនការ និងសំណង់។ ប៉ុន្តែ កាលពីខែមិថុនា រដ្ឋមន្ត្រីហិរញ្ញវត្ថុអ៊ីស្រាអែលបានប្រកាសដណ្តើមយកអំណាចគ្រប់គ្រងទាំងនេះ ដែលបង្កើនការព្រួយបារម្ភអំពីការរឹតត្បិតសិទ្ធិរបស់ប៉ាឡេស្ទីនលើទីតាំងសាសនាដ៏សំខាន់នេះ៕
