ប្រធានាធិបតីអាមេរិក លោក ដូណាល់ ត្រាំ បានបញ្ជាក់ថា កងកម្លាំងអាមេរិកបានបើកការវាយប្រហារលើប្រព័ន្ធការពារដែនអាកាសរបស់អ៊ីរ៉ង់ នៅលើកោះ Qeshm កាលពីថ្ងៃសុក្រ ទី៦ ខែវិច្ឆិកា ឆ្នាំ២០២៦។ ទន្ទឹមនឹងនេះ លោកក៏បានអះអាងថា ការចរចារវាងអាមេរិក និងអ៊ីរ៉ង់កំពុងមានការរីកចម្រើនយ៉ាងខ្លាំងផងដែរ។
សារព័ត៌មានAl Jazeera។
លោក ត្រាំ បានហៅការវាយប្រហារនេះថា ជាការវាយប្រហារតូចតាច ដោយអះអាងថា កងកម្លាំងអាមេរិកបានបំផ្លាញប្រព័ន្ធការពារប្រឆាំងយន្តហោះរបស់អ៊ីរ៉ង់ ក្នុងរយៈពេលប្រហែល ៥ ទៅ ១៥ នាទី។
ចំណែកប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា មានការវាយប្រហារដោយមីស៊ីលចំនួនពីរលើតំបន់ Suza នៃកោះ Qeshm ដែលស្ថិតនៅច្រកសមុទ្រ Hormuz ជាផ្លូវដឹកជញ្ជូនប្រេងដ៏សំខាន់របស់ពិភពលោក។ អ៊ីរ៉ង់ក៏បានអះអាងថា ប្រព័ន្ធការពារដែនអាកាសរបស់ខ្លួនបានស្ទាក់ចាប់ និងបំផ្លាញយន្តហោះគ្មានមនុស្សបើក MQ-9 របស់អាមេរិកមួយគ្រឿងផងដែរ។
ជាមួយគ្នានេះ បញ្ជាការដ្ឋានកណ្តាលអាមេរិក (CENTCOM) បានឱ្យដឹងថា ស្ថានការណ៍នៅតំបន់នោះមានភាពស្ងប់ស្ងាត់គួរសម ប៉ុន្តែមិនបានផ្តល់ព័ត៌មានលម្អិតបន្ថែមអំពីការវាយប្រហារនោះទេ។
ក្រៅពីនេះ CENTCOM ក៏បានប្រកាសផ្តល់ប្រាក់រង្វាន់រហូតដល់ ២០ លានដុល្លារ និងលទ្ធភាពផ្លាស់ប្តូរទីលំនៅ សម្រាប់អ្នកដែលផ្តល់ព័ត៌មានអំពីកម្មវិធីនុយក្លេអ៊ែររបស់អ៊ីរ៉ង់ រួមទាំងទីតាំង ឧបករណ៍ និងបុគ្គលិកពាក់ព័ន្ធផងដែរ៕
