ឯកអគ្គរដ្ឋទូតសហរដ្ឋអាមេរិកប្រចាំប្រទេសចិន បានទម្លាយថា ប្រធានាធិបតីអាមេរិកលោក Donald Trump បានសួរប្រធានាធិបតីចិន លោក Xi Jinping ថា តើទីក្រុងប៉េកាំង មានចំណាប់អារម្មណ៍ក្នុងការទិញអាវុធរបស់អាមេរិកដែរឬទេ?។
សារព័ត៌មានAnadolu នៅថ្ងៃទី២៨.០៩.២០២៦។
លោក David Perdue ឯកអគ្គរដ្ឋទូតសហរដ្ឋអាមេរិក ប្រចាំប្រទេសចិន បានប្រាប់បណ្តាញព័ត៌មាន Fox News កាលពីថ្ងៃអាទិត្យថា៖ ប្រធានាធិបតី Trump តែងតែលើកឡើងថា យើងលក់អាវុធទៅឱ្យប្រទេសផ្សេងៗទៀតនៅជុំវិញពិភពលោក។
តាមពិតទៅ លោក (ប្រធានាធិបតីអាមេរិក) បានសួរលោក Xi ថាតើលោកចង់ទិញអាវុធខ្លះដែរឬទេនៅពេលណាមួយ។
លោក Trump បានទទួលស្វាគមន៍លោក Xi សម្រាប់កិច្ចប្រជុំកំពូលដ៏សំខាន់មួយនៅសេតវិមានកាលពីថ្ងៃព្រហស្បតិ៍។
មេដឹកនាំទាំងពីរបានជួបគ្នាម្តងទៀត នៅថ្ងៃសុក្រ ដើម្បីពិសាទឹកតែជាលក្ខណៈឯកជន និងពិនិត្យមើលឯកសាររូបភាព និងអត្ថបទនានានៅទីក្រុងវ៉ាស៊ីនតោន មុនពេលលោក Xi ធ្វើដំណើរត្រឡប់ទៅប្រទេសវិញ ដែលជាការបញ្ចប់ដំណើរទស្សនកិច្ចផ្លូវរដ្ឋរយៈពេល ៣ ថ្ងៃរបស់លោកនៅសហរដ្ឋអាមេរិក។
លោក Perdue មិនបានបញ្ជាក់ថា តើលោក Xi បានឆ្លើយតបយ៉ាងណានោះទេ។
ដោយពណ៌នាដំណើរទស្សនកិច្ចផ្លូវរដ្ឋរបស់លោក Xi មកកាន់សហរដ្ឋអាមេរិកថាជាដំណើរទស្សនកិច្ច «ជោគជ័យ»ទីក្រុងប៉េកាំងបាននិយាយកាលពីថ្ងៃចន្ទថា ខ្លួន«ប្តេជ្ញាចិត្តចំពោះសន្តិភាពពិភពលោក»។
លោក Guo Jiakun អ្នកនាំពាក្យក្រសួងការបរទេសចិន បានប្រាប់អ្នកសារព័ត៌មាននៅទីក្រុងប៉េកាំងថា៖ «ប្រទេសចិនបានកសាងកងទ័ពរបស់ខ្លួនដោយផ្អែកលើតម្រូវការផ្ទាល់ខ្លួន ហើយប្តេជ្ញាចិត្តការពារសន្តិភាព និងស្ថិរភាពពិភពលោក»។
លោក Perdue បានលើកឡើងបែបនេះ ខណៈពេលដែលលោកការពារការបន្តលក់អាវុធរបស់ទីក្រុងវ៉ាស៊ីនតោនទៅឱ្យកោះតៃវ៉ាន់។
លោក Perdue បាននិយាយថា៖ «ប្រធានាធិបតី Trump តែងតែលើកឡើងថា យើងលក់អាវុធទៅឱ្យប្រទេសផ្សេងៗទៀតនៅជុំវិញពិភពលោក»។
មន្ត្រីក្រសួងការបរទេសអាមេរិកម្នាក់បានប្រាប់កាសែត South China Morning Post នាពេលបន្ទាប់មកថា ច្បាប់របស់សហរដ្ឋអាមេរិកហាមឃាត់ការលក់អាវុធទៅឱ្យប្រទេសចិន ហើយទីក្រុងវ៉ាស៊ីនតោន «គ្មានការផ្តល់ជូន ឬផែនការ» ណាមួយក្នុងការលក់អាវុធទៅឱ្យទីក្រុងប៉េកាំងនោះទេ។
លោក Perdue បាននិយាយថា គោលនយោបាយរបស់ទីក្រុងវ៉ាស៊ីនតោនចំពោះកោះតៃវ៉ាន់មិនមានការផ្លាស់ប្តូរទេ ដោយលោកបានលើកឡើងពីគោលនយោបាយ «ចិនតែមួយ» (one-China policy) ច្បាប់ស្តីពីទំនាក់ទំនងជាមួយតៃវ៉ាន់ (Taiwan Relations Act) សេចក្តីថ្លែងការណ៍រួមចំនួនបីរវាងសហរដ្ឋអាមេរិក និងចិន និងគោលការណ៍ «ការធានាទាំងប្រាំមួយ» (Six Assurances)។
លោកបាននិយាយថា៖ «យើងមិនគាំទ្រឯករាជ្យភាព ហើយយើងក៏មិនគាំទ្រការបង្ខិតបង្ខំដែរ»។ លោកបានបន្ថែម ក្នុងអំឡុងពេលនៃកិច្ចសហប្រតិបត្តិការយុទ្ធសាស្ត្រកាន់តែជិតស្និទ្ធរវាងសហរដ្ឋអាមេរិក និងចិនប្រឆាំងនឹងសហភាពសូវៀតក្នុងទសវត្សរ៍ឆ្នាំ 1980 ទីក្រុងវ៉ាស៊ីនតោនបានផ្គត់ផ្គង់ឧបករណ៍យោធាដល់ទីក្រុងប៉េកាំង រួមទាំងរ៉ាដាប្រឆាំងកាំភ្លើងធំ AN/TPQ-37 និងមីស៊ីល torpedo Mark-46។
ការលក់អាវុធរវាងរដ្ឋាភិបាលអាមេរិក និងរដ្ឋាភិបាលត្រូវបានផ្អាកជាបន្តបន្ទាប់ ដោយគ្មានកិច្ចព្រមព្រៀងលក់អាវុធយោធាបរទេសថ្មីណាមួយត្រូវបានបើកបន្ទាប់ពីឆ្នាំ 1990 នេះបើយោងតាមការិយាល័យទទួលខុសត្រូវរបស់រដ្ឋាភិបាលអាមេរិក។
ទីក្រុងប៉េកាំង ចាត់ទុកតៃវ៉ាន់ជាផ្នែកមួយនៃប្រទេសចិន ហើយបានជំទាស់ម្តងហើយម្តងទៀតចំពោះការលក់អាវុធរបស់សហរដ្ឋអាមេរិកទៅកាន់កោះនេះ៕
