ប្រធានាធិបតីវេណេស៊ុយអេឡា លោក នីកូឡាស ម៉ាឌូរ៉ូ (Nicolás Maduro) បានចោទប្រកាន់សហរដ្ឋអាមេរិកថា កំពុងធ្វើសកម្មភាពគំរាមកំហែងនិងគ្មានការទទួលខុសត្រូវបន្ទាប់ពីទីក្រុងវ៉ាស៊ីនតោនចាប់ផ្តើមសមយុទ្ធយោធារយៈពេលប្រាំថ្ងៃ នៅប្រទេស Trinidad និង Tobago ដែលស្ថិតនៅចម្ងាយត្រឹមប៉ុន្មានម៉ាយពីឆ្នេរវេណេស៊ុយអេឡា។
ប្រភពពីសារព័ត៌មានCNN នៅថ្ងៃទី១៦ខែវិច្ឆិកា។
ក្នុងសុន្ទរកថាមុខហ្វូងមនុស្សជាច្រើននៅសង្កាត់ Petare Caracas នៅថ្ងៃសៅរ៍ លោក ម៉ាឌូរ៉ូ បានព្រមានថា សហរដ្ឋអាមេរិកកំពុងបន្តសង្គ្រាមឧក្រិដ្ឋកម្មនៅក្នុងតំបន់ Caribbean ហើយទាមទារឲ្យប្រជាជន Trinidad និង Tobago ពិចារណាថា តើពួកគេត្រូវបន្តអនុញ្ញាតឱ្យដីទឹករបស់ខ្លួន ត្រូវបានប្រើប្រាស់សម្រាប់គំរាមកំហែងយ៉ាងធ្ងន់ធ្ងរដែរ ឬទេ។
ការព្រួយបារម្ភរបស់វេណេស៊ុយអេឡាបានកើតឡើង បន្ទាប់ពីព្រះរាជអាជ្ញានៃ Trinidad និង Tobago ប្រាប់ Financial Times ថា សហរដ្ឋអាមេរិកនឹងបង្កើនសមយុទ្ធយោធា នៅក្នុងប្រទេសកោះភ្លោះនេះ។ កាលពីពេលថ្មីៗ សហរដ្ឋអាមេរិកក៏បានបញ្ជូននាវាពិឃាតមីស៊ីលដឹកនាំ និងកងម៉ារីនទី 22 មកកាន់តំបន់ ដោយអះអាងថា ជាការគាំទ្របេសកកម្មប្រឆាំងការជួញដូរគ្រឿងញៀនខុសច្បាប់។
រដ្ឋមន្ត្រីការបរទេស Trinidad និង Tobago លោក Sean Sobers បានបដិសេធថា សមយុទ្ធសប្តាហ៍ក្រោយមិនមែនជាជំហានដំបូងនៃសកម្មភាពយោធាណាមួយរបស់សហរដ្ឋអាមេរិក ទៅលើប្រទេសជិតខាងឡើយ។ ក៏ប៉ុន្តែ ការចូលមកនៃកងកម្លាំងអាមេរិក—រួមទាំងនាវាផ្ទុកយន្តហោះ USS Gerald R. Ford ដែលជានាវាចម្បាំងធំបំផុតរបស់អាមេរិកបានបង្កើនការភ័យខ្លាចថា តំបន់អាចទៅរកជម្លោះធំ៕