ប្រធានអាស៊ាន បានកោះប្រជុំពិសេសនៃបណ្ដារដ្ឋមន្ត្រីការបរទេសអាស៊ាន ក្នុងបំណងដោះស្រាយ ភាពតានតឹងរវាងកម្ពុជានិងថៃ ដែលកិច្ចប្រជុំនេះ នឹងធ្វើឡើង នៅទីក្រុងគូឡាឡាំពួ នៅថ្ងៃទី២២ ខែធ្នូ ឆ្នាំ២០២៥។
លោកនាយករដ្ឋមន្ត្រីនិងជាប្រធានអាស៊ាន អាន់វ៉ា អ៊ីប្រាហ៊ីម បានសង្ឃឹមថាកិច្ចប្រជុំនេះ នឹងក្លាយជាវេទិកាសម្រាប់កម្ពុជា និងថៃ ក្នុងកិច្ចសន្ទនាដោយបើកចំហ និងប្រកបដោយលក្ខណៈស្ថាបនាឆ្ពោះទៅរកការបន្ធូរបន្ថយភាពតានតឹង រវាងប្រទេសទាំងពីរ។
ប្រភពពីព័ត៌មានម៉ាឡេស៊ី Bernama។
ក្រសួងការបរទេសម៉ាឡេស៊ី បាននិយាយនៅក្នុងសេចក្ដីថ្លែងការណ៍មួយចេញផ្សាយនៅថ្ងៃទី២១ ខែធ្នូថា កិច្ចប្រជុំពិសេសនឹងត្រូវបានធ្វើឡើងតបតាមការសម្រេចចិត្តរបស់នាយករដ្ឋមន្ត្រីម៉ាឡេស៊ី កម្ពុជា និងថៃ កាលពីថ្ងៃទី១១ ខែធ្នូ។
កិច្ចប្រជុំពិសេសនេះនឹងត្រូវដឹកនាំដោយរដ្ឋមន្ត្រីការបរទេសម៉ាឡេស៊ី លោក Mohamad Hasan។
សេចក្ដីថ្លែងការណ៍ដដែលបានគូសបញ្ជាក់ទៀតថាកិច្ចប្រជុំនៅថ្ងៃចន្ទស្អែកនេះនឹងក្លាយ ជាវេទិកាមួយសម្រាប់បណ្ដារដ្ឋមន្ត្រីការបរទេសអាស៊ានផ្លាស់ប្ដូរយោបល់លើស្ថានការណ៍សព្វថ្ងៃរវាងកម្ពុជា និងថៃ ហើយដើម្បីពិចារណាលើការបោះឆ្នោតជំហានដែលអាចធ្វើបានថាអាស៊ានអាចចូលរួមគាំទ្រដល់ កិច្ចប្រឹងប្រែងឆ្ពោះទៅរកការបន្ធូរបន្ថយជម្លោះ និងបញ្ឈប់អរិភាព ដើម្បីប្រយោជន៍ដល់សន្តិភាព ស្ថិរភាពរវាងប្រទេសជាសមាជិកអាស៊ានទាំង២ និងតំបន់ទាំងមូល។
តាមក្រសួងការបរទេសម៉ាឡេស៊ី កិច្ចប្រជុំពិសេសរដ្ឋមន្ត្រីការបរទេសអាស៊ានឆ្លុះបញ្ចាំងពីការប្ដេជ្ញាចិត្តរបស់រដ្ឋជាសមាជិកអាស៊ានចំពោះការរួបរួម និងសាមគ្គីភាព ព្រមទាំងតួនាទីស្នូលរបស់អាស៊ានក្នុងការថែរក្សា សន្តិភាព សន្តិសុខ ស្ថិរភាព និងវិបុលភាពនៅក្នុងតំបន់ ស្របទៅតាមធម្មនុញ្ញអាស៊ាន និងសន្ធិសញ្ញាមិត្តភាព និងកិច្ចសហប្រតិបត្តិការក្នុងតំបន់អាស៊ីអាគ្នេយ៍៕