នាយករដ្ឋមន្ត្រីចក្រភពអង់គ្លេស លោក Keir Starmer បានពិភាក្សាតាមទូរស័ព្ទជាមួយប្រធានាធិបតីអាមេរិក លោក Donald Trump អំពីកិច្ចខិតខំប្រឹងប្រែងអន្តរជាតិ ដើម្បីបញ្ចប់សង្គ្រាមរវាងរុស្ស៊ី និងអ៊ុយក្រែន កាលពីថ្ងៃអាទិត្យទី២១ខែធ្នូ។
ប្រភពពីសារព័ត៌មានAnadolu Agencyនៅថ្ងៃទី២២ខែធ្នូ។
សេចក្តីថ្លែងការណ៍បានបញ្ជាក់ថា លោក Starmer បានធ្វើបច្ចុប្បន្នភាពជូនលោក Trump អំពីការងាររបស់ សម្ព័ន្ធភាពឆន្ទៈ ដែលកំពុងគាំទ្រការសម្រេចបាននូវកិច្ចព្រមព្រៀងសន្តិភាព និងធានាឱ្យមានការបញ្ចប់អរិភាពដោយយុត្តិធម៌ និងយូរអង្វែង សម្រាប់អ៊ុយក្រែន និងសន្តិសុខនៅតំបន់អឺរ៉ូ-អាត្លង់ទិក។
ការពិភាក្សានេះកើតឡើងបន្ទាប់ពីលោក Starmer បានធ្វើជាសហប្រធាននៃកិច្ចប្រជុំអនឡាញមួយរបស់សម្ព័ន្ធភាពឆន្ទៈកាលពីសប្តាហ៍មុន ដែលថ្នាក់ដឹកនាំបានឯកភាពថា ពេលវេលាបច្ចុប្បន្នមានសារៈសំខាន់យ៉ាងខ្លាំងសម្រាប់អ៊ុយក្រែន ប្រជាជនរបស់ខ្លួន និងសន្តិសុខរួមនៅទូទាំងតំបន់៕