ប្រធានាធិបតីអ៊ុយក្រែន លោក Volodymyr Zelenskiy បានអះអាងថា រុស្ស៊ីកំពុងប្រើប្រាស់ទឹកដីប្រទេសបេឡារុស ដើម្បីវាយប្រហារគោលដៅនៅអ៊ុយក្រែន និងគេចវេះប្រព័ន្ធការពារតាមអាកាសរបស់ទីក្រុងគៀវ។
ប្រភពពីសារព័ត៌មានReuters នៅថ្ងៃទី២៧ខែធ្នូ។
លោកបានបញ្ជាក់ថា ឧបករណ៍យោធារុស្ស៊ី រួមទាំងអង់តែន និងឧបករណ៍ណែនាំដ្រូនត្រូវបានដាក់នៅលើដំបូលអគារលំនៅដ្ឋានធម្មតានៅតំបន់ជិតព្រំដែនបេឡារុស ដែលបង្កហានិភ័យដល់ជីវិតប្រជាពលរដ្ឋ។
លោក Zelenskiy រិះគន់ថា បេឡារុសកំពុងលះបង់អធិបតេយ្យភាពរបស់ខ្លួន ដោយអនុញ្ញាតឱ្យរុស្ស៊ីប្រើទឹកដីសម្រាប់មហិច្ឆតាឈ្លានពាន។ ទន្ទឹមនឹងនេះ អ៊ុយក្រែនកំពុងពិភាក្សាអំពីការផ្តល់ហិរញ្ញប្បទាន និងការកែប្រែយុទ្ធសាស្ត្រការពារតាមអាកាស ដោយផ្តោតលើដ្រូនស្ទាក់ចាប់ ដើម្បីការពារហេដ្ឋារចនាសម្ព័ន្ធ និងតំបន់ជួរមុខ៕