រដ្ឋាភិបាលនីហ្សេរីយ៉ា បានប្រកាសថាការវាយប្រហារតាមអាកាសដែលគាំទ្រដោយសហរដ្ឋអាមេរិក បានវាយប្រហារជំរំពីរដែលមានទំនាក់ទំនងជាមួយក្រុមរដ្ឋអ៊ីស្លាម (ISIS) នៅក្នុងព្រៃ Bauni នៃរដ្ឋ Sokoto ភាគពាយ័ព្យប្រទេសនីហ្សេរីយ៉ា។ប្រតិបត្តិការនេះធ្វើឡើងតាមសំណើរបស់រដ្ឋាភិបាលនីហ្សេរីយ៉ា និងត្រូវបានអនុម័តដោយប្រធានាធិបតី Bola Tinubu។
ប្រភពពីសារព័ត៌មានReuters នៅថ្ងៃទី២៨ខែធ្នូ។
ការវាយប្រហារបានប្រើដ្រូនMQ-9 Reaper ដោយបាញ់គ្រាប់រំសេវចំនួន 16 គ្រាប់ ដើម្បីកម្ទេចគោលដៅដែលត្រូវបានគេជឿថាជាក្រុមយុទ្ធជន ISIS បរទេស ដែលជ្រៀតចូលពីតំបន់ Sahel និងកំពុងរៀបចំផែនការវាយប្រហារធំៗក្នុងប្រទេស។ អាជ្ញាធរបានអះអាងថា មិនមានរបាយការណ៍អំពីជនស៊ីវិលស្លាប់ ឬរងរបួសទេ ទោះបីមានកម្ទេចកម្ទីធ្លាក់ក្នុងតំបន់ខ្លះក៏ដោយ។
ប្រធានាធិបតីអាមេរិក Donald Trump បានពណ៌នាប្រតិបត្តិការនេះថាជាការវាយប្រហារដែលមានប្រសិទ្ធភាពខ្ពស់ និងព្រមានថា អាចមានសកម្មភាពបន្ថែមទៀត។ ការវាយប្រហារនេះបង្ហាញពីកិច្ចសហប្រតិបត្តិការសន្តិសុខដ៏កម្ររវាងសហរដ្ឋអាមេរិក និងនីហ្សេរីយ៉ា ក្នុងការប្រយុទ្ធប្រឆាំងអំពើភេរវកម្ម ខណៈដែលការគំរាមកំហែងពីក្រុមជ្រុលនិយមនៅតំបន់ Sahel កំពុងកើនឡើង៕