កូនស្រីរបស់មេដឹកនាំកូរ៉េខាងជើង លោក គីម ជុងអ៊ុន មានឈ្មោះថា Ju Ae បានអមដំណើរជាមួយឪពុក និងម្ដាយដោយធ្វើដំណើរទស្សនកិច្ចជាសាធារណៈលើកដំបូងបំផុតរបស់នាងទៅកាន់វិមានបូជនីយដ្ឋាន Kumsusan ដើម្បីគោរពវិញ្ញាណក្ខន្ធដល់អតីតមេដឹកនាំរបស់កូរ៉េខាងជើង។ ប្រភពពីសារព័ត៌មាន Reuters នៅថ្ងៃសុក្រ ទី២ ខែមករា។
កូនស្រីលោក គីម ជុងអ៊ុន ឈ្មោះ Ju Ae បានបង្ហាញខ្លួនកាន់តែ ច្រើនឡើងតាមកញ្ចក់ទូរទស្សន៍រដ្ឋ ក្នុងពេល៣ឆ្នាំចុងក្រោយនេះដោយធ្វើឱ្យក្រុមអ្នកវិភាគខ្លះ និងទីភ្នាក់ងារស៊ើបការណ៍សម្ងាត់កូរ៉េខាងត្បូងសង្ស័យថាក្មេងស្រីរូបនេះប្រហែលជាត្រូវបាន ជ្រើសរើសជាអ្នកស្នងតំណែងបន្តពីលោក គីម ជុងអ៊ុនក្លាយជាមេដឹកនាំជំនាន់ទី៤នៃគ្រួសារគីម នៅពេលអនាគត។
ដំណើរទស្សនកិច្ចរបស់លោក គីម ជុងអ៊ុន ទៅកាន់វិមាន Kumsusan ដើម្បីគោរពវិញ្ញាណក្ខន្ធជីតា គឺលោក គីម អ៊ីលស៊ុង និងឪពុកគឺលោក គីម ជុងអ៊ីល ក្នុងថ្ងៃដ៏សំខាន់ និងខួបអនុស្សាវរីយ៍ធ្វើឡើងក្នុងចេតនាបង្ហាញពីអំណាចគ្រួសារត្រកូលគីមដែលកំពុងគ្រប់គ្រងកូរ៉េខាងជើងជារដ្ឋប្រដាប់ដោយអាវុធនុយក្លេអ៊ែរ៕