ចំនួនអ្នកស្លាប់ដោយសារផ្ទុះរោងចក្រដែកថែបនៅតំបន់ស្វយ័តម៉ុងហ្គោលី ភាគខាងជើងប្រទេសចិន បានកើនដល់១០នាក់ហើយ ។
បន្ទាប់ពីអាជ្ញាធរបញ្ជាក់ថា មនុស្ស៨ នាក់ ដែលពីមុនត្រូវបានរាយការណ៍ថា បាត់ខ្លួន ត្រូវបានរកឃើញស្លាប់ទាំងអស់។ ឧប្បត្តិហេតុនេះ បានកើតឡើងនៅរោងចក្រផលិតបន្ទះដែក របស់ក្រុមហ៊ុន Baogang United Steel ក្នុងទីក្រុង Baotou កាលពីថ្ងៃអាទិត្យ។
ប្រភពពីសារព័ត៌មាន Anadolu Agency នៅថ្ងៃទី២២ ខែមករា។
ការផ្ទុះពាក់ព័ន្ធនឹងធុងរាងស្វ៊ែរទំហំ៦៥០ ម៉ែត្រគូប ដែលមានទឹក និងចំហាយទឹកឆ្អែត ហើយបណ្តាលឱ្យមនុស្ស៨៤ នាក់រងរបួស។
អាជ្ញាធរបានដាក់ពង្រាយបុគ្គលិកជាង ១,០០០នាក់ ដើម្បីអនុវត្តប្រតិបត្តិការស្វែងរក និងជួយសង្គ្រោះ។
បន្ទាប់ពីឧប្បត្តិហេតុ អាជ្ញាធរចិន បានចាប់ផ្តើមត្រួតពិនិត្យសុវត្ថិភាព កន្លែងធ្វើការយ៉ាងទូលំទូលាយទូទាំងទីក្រុង និងបានចាត់វិធានការផ្លូវច្បាប់ ចំពោះអ្នកដែលត្រូវបានចាត់ទុកថា ទទួលខុសត្រូវ។ ការស៊ើបអង្កេតពេញលេញ លើមូលហេតុនៃការផ្ទុះនៅតែបន្តដំណើរការ៕