អ្នកការទូតគុយបាបានបញ្ជាក់ថា ប្រទេសគុយបា និងសហរដ្ឋអាមេរិកកំពុងមានការទំនាក់ទំនងគ្នា ទោះបីជាមិនទាន់ឈានដល់កម្រិតការសន្ទនាជាផ្លូវការនៅឡើយក៏ដោយ ខណៈដែលប្រធានាធិបតីអាមេរិក លោក Donald Trump បង្កើនសម្ពាធ និងគំរាមកំហែងបិទផ្លូវដឹកជញ្ជូនប្រេងទៅកាន់កោះគុយបា។
ប្រភពពីសារព័ត៌មានAl Jazeera នៅថ្ងៃទី៣ខែកុម្ភៈ។
អនុរដ្ឋមន្ត្រីការបរទេសគុយបា លោក Carlos Fernandez de Cossio បាននិយាយថា ទីក្រុងហាវ៉ាណាត្រៀមខ្លួនរួចជាស្រេចសម្រាប់ការសន្ទនាជាមួយទីក្រុងវ៉ាស៊ីនតោន ប៉ុន្តែបានសង្កត់ធ្ងន់ថា បញ្ហាសំខាន់មួយចំនួនមិនអាចចរចាបានឡើយ រួមមាន រដ្ឋធម្មនុញ្ញ និងប្រព័ន្ធរដ្ឋាភិបាលសង្គមនិយមរបស់ប្រទេស។
ការបញ្ជាក់នេះកើតឡើងនៅពេលភាពតានតឹងរវាងប្រទេសទាំងពីរកើនឡើងវិញ បន្ទាប់ពីសហរដ្ឋអាមេរិកបានបង្កើនសម្ពាធនយោបាយ និងសេដ្ឋកិច្ចលើគុយបា ខណៈប្រទេសនេះកំពុងប្រឈមវិបត្តិសេដ្ឋកិច្ចធ្ងន់ធ្ងរ និងស្ថិតក្រោមទណ្ឌកម្មរបស់អាមេរិកអស់រយៈពេលយូរមកហើយ៕