កុងហ្គោ កំពុងប្រឈមនឹងការផ្ទុះជំងឺអេបូឡាថ្មី ដោយបុគ្គលិកសុខាភិបាលជាក្រុមដែលរងផលប៉ះពាល់ខ្លាំងបំផុត។ អង្គការសុខភាពពិភពលោក (WHO) បានឱ្យដឹងថា គិតចាប់តាំងពីការប្រកាសការផ្ទុះជំងឺនៅថ្ងៃទី ១៥ ខែឧសភា មានបុគ្គលិកសុខាភិបាលប្រមាណ៧៥នាក់បានឆ្លងជំងឺអេបូឡា ហើយក្នុងនោះ១៧នាក់បានស្លាប់។
ប្រភពពីសារព័ត៌មានAnadolu Agency នៅថ្ងៃទី២០ខែមិថុនា។
មន្ត្រី WHO បានបញ្ជាក់ថា បុគ្គលិកសុខាភិបាលគឺជាមនុស្សដំបូងៗដែលឆ្លងជំងឺនេះ ខណៈអ្នកជំងឺជាច្រើនមិនបានបង្ហាញរោគសញ្ញាហូរឈាមនៅដំណាក់កាលដំបូង ដែលធ្វើឱ្យពិបាកក្នុងការរកឃើញ និងទប់ស្កាត់ការឆ្លងរាលដាល។
អាជ្ញាធរសុខាភិបាលកុងហ្គោបានរាយការណ៍ថា មានករណីអេបូឡាបញ្ជាក់ជិត ៩០០ ករណី និងអ្នកស្លាប់ ២៣២ នាក់ នៅក្នុងតំបន់សុខភាពចំនួន ៣៣ នៃខេត្ត Ituri, North Kivu និង South Kivu។ ក្នុងចំណោមនោះ ខេត្ត Ituri មានករណីជិត ៩៥% នៃចំនួនសរុប។
មន្ត្រីសុខាភិបាលបានអំពាវនាវឱ្យប្រជាពលរដ្ឋសហការជាមួយក្រុមឆ្លើយតប និងទៅពិនិត្យសុខភាពឱ្យបានឆាប់រហ័ស ដើម្បីជួយទប់ស្កាត់ការរីករាលដាលនៃជំងឺដ៏គ្រោះថ្នាក់នេះ៕
