ចំនួនអ្នកស្លាប់ក្នុងគ្រោះថ្នាក់សាឡាងនៅបឹងការ៉ីបា (Lake Kariba) ប្រទេសហ្ស៊ីមបាវ៉េ បានកើនឡើងដល់ ៦៨នាក់ បន្ទាប់ពីក្រុមសង្គ្រោះបានរកឃើញសាកសពចំនួន ២២នាក់បន្ថែមទៀត។
ប្រភពពីសារព័ត៌មានReuter នៅថ្ងៃទី១៦ខែសីហា។
គ្រោះថ្នាក់នេះបានកើតឡើងកាលពីថ្ងៃទី១១ ខែសីហា នៅពេលសាឡាងដឹកអ្នកដំណើរមួយគ្រឿងបានក្រឡាប់នៅលើបឹងការ៉ីបា។ ការស៊ើបអង្កេតបឋមបានបង្ហាញថា សាឡាងអាចមានអ្នកដំណើរលើសចំណុះ ខណៈពេលមានខ្យល់បក់ខ្លាំង ដែលបណ្តាលឱ្យសាឡាងបាត់លំនឹង និងក្រឡាប់។
ប៉ូលិសហ្ស៊ីមបាវ៉េបានបញ្ជាក់ពីចំនួនអ្នកស្លាប់ចុងក្រោយតាមបណ្តាញសង្គម X ខណៈប្រតិបត្តិការស្វែងរកសាកសព និងការស៊ើបអង្កេតលើមូលហេតុនៃគ្រោះថ្នាក់នៅតែបន្ត៕
