អាកាសយានដ្ឋានកាតានៀ(Catania)នៅកោះស៊ីស៊ីលី ប្រទេសអ៊ីតាលី បានចាប់ផ្តើមដំណើរការជើងហោះហើរឡើងវិញ បន្ទាប់ពីអាជ្ញាធរបានបន្ថយកម្រិតការព្រមានសុវត្ថិភាពអាកាសចរណ៍ពី ក្រហមមកពណ៌ទឹកក្រូច ដោយសារសកម្មភាពភ្នំភ្លើងអេតណា (Mount Etna) បានថយចុះ។
ប្រភពពីសារព័ត៌មានReuter កាលពីថ្ងៃសៅរ៍ទី១៥ខែសីហា។
ផេះភ្នំភ្លើងពីការផ្ទុះរបស់ភ្នំអេតណា បានបង្ខំឱ្យអាកាសយានដ្ឋានលុបចោល ឬបង្វែរជើងហោះហើររាប់រយជើងក្នុងរយៈពេលមួយសប្តាហ៍កន្លងមក។ អាកាសយានដ្ឋានកាតានៀ ដែលជាមជ្ឈមណ្ឌលអាកាសចរណ៍មានអ្នកដំណើរច្រើនបំផុតទី៥ របស់ប្រទេសអ៊ីតាលី បានប្រកាសកាលពីថ្ងៃសុក្រថា នឹងផ្អាកជើងហោះហើរទាំងអស់រហូតដល់ម៉ោង ១៣:០០ GMT នៅថ្ងៃទី១៥ ខែសីហា។
ការបន្ថយកម្រិតប្រកាសអាសន្ន បានអនុញ្ញាតឱ្យអាកាសយានដ្ឋានចាប់ផ្តើមបើកដំណើរការឡើងវិញ ខណៈអាជ្ញាធរនៅតែតាមដានសកម្មភាពរបស់ភ្នំភ្លើងអេតណាយ៉ាងជិតស្និទ្ធ៕
