(ខេត្តកំពង់ចាម)៖ កាលពីថ្ងៃទី២៤ ខែសីហា ឆ្នាំ២០២៦ លោក ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំក្រុមការងារចុះប្រតិបត្តិការត្រួតពិនិត្យ និងបង្រ្កាបបទល្មើសជលផលនៅចំណុចអ្នកតាប៉ោត បឹងឈ្នាង បឹងដំរីឆ្លង ឃុំរាយប៉ាយ និងចំណុច ព្រែកខ្លាក្រទាម ឃុំព្រែកគុយ ស្រុកកងមាស ខេត្តកំពង់ចាម។
ប្រតិបត្តិ ការនេះ មានការអញ្ជើញចូលរួមពីប្រធាននាយកដ្ឋានអធិការកិច្ចជលផល នៃអគ្គនាយកដ្ឋានជលផល នាយខណ្ឌរដ្ឋបាលជលផលខេត្តកំពង់ចាម សហការជាមួយនាយកដ្ឋានអធិការកិច្ចជលផល អធិការដ្ឋានរដ្ឋបាលជលផលមេគង្គ គម្រោងអច្ឆរិយភាពនៃទន្លេមេគង្គ អាជ្ញាធរស្រុកកងមាស និងកម្លាំងប៉ុស្តិ៍នគរបាលរដ្ឋបាលស្តៅ ក្រោមការសម្របសម្រួលពីលោក ព្រះរាជអាជ្ញានៃអយ្យការអមសាលាដំបូងខេត្តកំពង់ចាម។
លោក ប៉ែន ផល្លី បានបញ្ជាក់ថា ក្រុមការងារបានការុះរើបំផ្លាញចោលនូវឧបករណ៍ខុសច្បាប់រួមមាន ឧបករណ៍ស្បៃមុងចំនួន ៣៧មាត់ របាំងស្បៃមុង៣ ០៥០ម៉ែត្រ ឧបករណ៍សាច់អួនលើសប្រវែង៤មាត់ របាំង៥៥០ម៉ែត្រ ចម្រឹង/បង្គោលចំនួន៧២០ដើម និងបានចាក់លែងកូនត្រីចម្រុះចូលបឹងធម្មជាតិវិញប្រមាណ១៧៥គីឡូក្រាម។ ជាមួយគ្នានេះ ក្រុមការងារបានចុះរើសម្រាស់និងកំប្លោកដែលបាំងខ្ទប់ព្រែកដែលមិនអាចឱ្យកាណូតធ្វើចរាចរណ៍បាន រហូតដល់សម្រាស់ទាំងនោះបានបែកជាចំណែកៗនិងហូរតាមទឹកអស់។
ជាចុងក្រោយ លោកឯកឧត្តម ប៉ែន ផល្លី បានថ្លែងអំណរគុណ និងសរសើរដល់ក្រុមការងារចម្រុះ ដែលតែងតែខិតខំប្រឹងប្រែងទប់ស្កាត់បទល្មើសជលផលបានយ៉ាងសកម្មផងដែរ៕
