ក្រុមពន្លត់អគ្គិភ័យនៅរដ្ឋNevada របស់សហរដ្ឋអាមេរិក ចាប់ផ្តើមគ្រប់គ្រងបានភ្លើងឆេះព្រៃដ៏ធំមួយនៅជិតទីក្រុងReno។ អគ្គិភ័យនេះបានបំផ្លាញផ្ទះជាង ៣០ខ្នង ហើយបានឆេះយ៉ាងកៀកតំបន់លំនៅឋានដែលមានប្រជាជនរស់នៅច្រើន។
ប្រភពពីសារព័ត៌មានAp នៅថ្ងៃទី២៥ខែសីហា។
អាជ្ញាធរបាននិយាយថា គិតត្រឹមថ្ងៃចន្ទ ក្រុមពន្លត់អគ្គិភ័យអាចគ្រប់គ្រងភ្លើងបានប្រមាណ ២៧% ហើយទំហំតំបន់ដែលភ្លើងបានឆេះ មិនបានពង្រីកបន្ថែមទៀតទេ។ ភ្លើងបានគ្របដណ្តប់ផ្ទៃដីប្រមាណ ៦០គីឡូម៉ែត្រការ៉េ។
ដោយសារភ្លើងចាប់ផ្តើមស្ថិតក្រោមការគ្រប់គ្រង អាជ្ញាធរបានកាត់បន្ថយចំនួនប្រជាជនដែលត្រូវជម្លៀស ឬទទួលការព្រមានពីប្រហែល ៩០,០០០នាក់ មកនៅប្រហែល ៦៣,០០០នាក់។
ទោះយ៉ាងណា ស្ថានការណ៍នៅតែមានគ្រោះថ្នាក់ ព្រោះតំបន់ជុំវិញនៅស្ងួត និងមានរុក្ខជាតិដែលងាយឆេះ។ ប្រសិនបើខ្យល់បក់ខ្លាំងឡើងវិញ វាអាចជួយរុញភ្លើងឱ្យឆេះបន្តទៅកាន់តំបន់លំនៅឋានថ្មីៗ។
មន្ត្រីព្រៃឈើអាមេរិក Matt Zumstein បាននិយាយថា ក្រុមការងារកំពុងមានការរីកចម្រើនក្នុងការគ្រប់គ្រងអគ្គិភ័យ ប៉ុន្តែអាជ្ញាធរនៅតែតាមដានស្ថានការណ៍យ៉ាងជិតស្និទ្ធ៕
