នាយករដ្ឋមន្ត្រីជប៉ុន លោកស្រីSanae Takaichi បានស្នើឱ្យរុស្ស៊ីដករូបសំណាកមួយដែលដាក់តាំងនៅទីក្រុង Khabarovsk ភាគខាងកើតរុស្ស៊ី ដោយសាររូបសំណាកនេះបង្ហាញពីការបំផ្លាញនិមិត្តសញ្ញាជាតិរបស់ជប៉ុន។
ប្រភពពីសារព័ត៌មានAnadolu Agency កាលពីថ្ងៃទី៥ខែកញ្ញា។
រូបសំណាកនេះបង្ហាញ ទាហានសូវៀតកំពុងបំផ្លាញផ្ទាំងថ្មដែលមានរូបផ្កាគ្រីសាន់ធឺមុំ ដែលជានិមិត្តសញ្ញាដ៏សំខាន់របស់ជប៉ុន។ រូបសំណាកនេះត្រូវបានដាក់បង្ហាញកាលពីថ្ងៃសុក្រ។
លោកស្រី Takaichi បាននិយាយថា ការដាក់រូបសំណាកបែបនេះគឺ មិនអាចទទួលយកបាន។ រដ្ឋមន្ត្រីការបរទេសជប៉ុន Toshimitsu Motegi ក៏បាននិយាយថា រូបសំណាកនេះអាចប៉ះពាល់ដល់ទំនាក់ទំនងរវាងជប៉ុន និងរុស្ស៊ី។
ជប៉ុនបានប្រើផ្លូវការទូត ដើម្បីស្នើឱ្យរុស្ស៊ីបញ្ឈប់ការដាក់តាំង និងដករូបសំណាកនេះចេញ ប៉ុន្តែរហូតមកដល់ពេលនេះ រុស្ស៊ីមិនទាន់ឆ្លើយតបជាផ្លូវការឡើយ។
សូមបញ្ជាក់ថា៖ ទំនាក់ទំនងរវាងជប៉ុន និងរុស្ស៊ីកំពុងមានភាពតានតឹងផងដែរ ដោយសារបញ្ហាជម្លោះដែនកោះនៅជិតប្រទេសជប៉ុន៕
