(ស្វាយរៀង)៖ ចៅក្រមស៊ើបសួរនៃសាលាដំបូង ខេត្តស្វាយរៀង បានសម្រេចឃុំខ្លួនឈ្មោះ សុខ ធន់ ពីបទ៖ សមគំនិតក្នុងអំពើកំហែងយកលុយចំនួន៩.០០០ដុល្លារ។
នេះបើយោងតាមដីការបស់សាលាដំបូងខេត្តស្វាយរៀង ចុះថ្ងៃទី៥ ខែកញ្ញា ឆ្នាំ២០២៦។
ជនត្រូវចោទឈ្មោះ សុខ ធន់ ភេទប្រុស អាយុ ៤៧ឆ្នាំ ជនជាតិខ្មែរ រស់នៅភូមិហែកសំណាញ់ ឃុំម៉ឺនជ័យ ស្រុក រំដួល ខេត្តស្វាយរៀង។
ជនត្រូវចោទខាងលើ បានជំរិតយកលុយចំនួន៩.០០០ដុល្លារពីឡានដឹកក្រណាត់ ដែលបានប្រព្រឹត្តនៅចំណុច ខេត្តស្វាយរៀង កាលពីថ្ងៃទី៣ រហូតដល់ថ្ងៃទី៥ ខែសីហា ឆ្នាំ២០២៦ ក្នុងបទល្មើសដែលមានចែងតាមមាត្រា២៩, មាត្រា៣៦៣និងមាត្រា ៣៦៤នៃក្រមព្រហ្មទណ្ឌ។
សូមរំលឹកថា ថ្មីៗនេះមានការបែកធ្លាយនូវវីដេអូ ដែលជនត្រូវចោទឈ្មោះ សុខ ធន់ អង្គុយរាប់លុយចំនួន៩.០០០ដុល្លារ។
ដែលខ្លួនបានជំរិតយកពីឡានដឹកក្រណាត់ បង្កការភ្ញាក់ផ្អើលនិងការរិះគន់ រហូតឈានដល់ចាប់ខ្លួនឈ្មោះ សុខ ធន់ ខណៈប្រធានការិយាល័យនគរបាលប្រឆាំងបទល្មើសសេដ្ឋកិច្ចខេត្តស្វាយ ក៏ប្រឈមនឹងផ្លូវច្បាប់ផងដែរ៕
