(សៀមរាប)៖ កម្លាំងនគរបាលស្រុកស្រីស្នំ ខេត្តសៀមរាប បានចាត់វិធានការភ្លាមៗ ក្រោយកើតមានហេតុការណ៍ហិង្សាស្រាលរវាងយុវតីពីរក្រុម ដោយប្រតាយប្រតប់ និងបោចសក់គ្នា នៅកន្លែងរាំធុងបាស់ ត្រង់ចំណុចប្រាសាទក្បាលបី ស្ថិតក្នុងភូមិស្លែងស្ពាន ឃុំស្លែងស្ពាន ស្រុកស្រីស្នំ កាលពីរសៀលថ្ងៃទី២០ ខែកញ្ញា ឆ្នាំ២០២៦។
យោងតាមព័ត៌មានពីសមត្ថកិច្ច ករណីនេះបានកើតឡើងនៅវេលាម៉ោងប្រមាណ ៤:០០នាទីរសៀល ថ្ងៃទី២០ ខែកញ្ញា ឆ្នាំ២០២៦។ បន្ទាប់ពីទទួលបានព័ត៌មាន កម្លាំងនគរបាលនៃអធិការដ្ឋាននគរបាលស្រុកស្រីស្នំ បានចេញអន្តរាគមន៍ភ្លាមៗ ដើម្បីទប់ស្កាត់មិនឱ្យជម្លោះវិវត្តទៅជាអំពើហិង្សាធ្ងន់ធ្ងរ។
នៅថ្ងៃទី២១ ខែកញ្ញា ឆ្នាំ២០២៦ កម្លាំងនគរបាលផែនការងារព្រហ្មទណ្ឌ សហការជាមួយកម្លាំងនគរបាលព្រហ្មទណ្ឌនៃអធិការដ្ឋាននគរបាលស្រុកស្រីស្នំ បានបន្តនីតិវិធី និងនាំខ្លួនយុវតីដែលពាក់ព័ន្ធមកសាកសួរ សរុបចំនួន ១០នាក់ ដែលមានអាយុចន្លោះពី ១៣ ដល់ ១៥ឆ្នាំ។
តាមសមត្ថកិច្ច យុវតីទាំង ១០នាក់ ត្រូវបានបែងចែកជា ២ក្រុម ក្នុងនោះក្រុមទី១ មានចំនួន ៤នាក់ និងក្រុមទី២ មានចំនួន ៦នាក់។ ក្នុងពេលសាកសួរ យុវតីទាំងពីរក្រុមបានទទួលស្គាល់ថា ពួកគេពិតជាបានប្រតាយប្រតប់ និងបោចសក់គ្នាទៅវិញទៅមក នៅកន្លែងកើតហេតុប្រាកដមែន ប៉ុន្តែមិនមានអ្នកណាម្នាក់រងរបួសឡើយ។
តាមការបំភ្លឺ មូលហេតុដែលនាំឱ្យកើតមានជម្លោះ គឺដោយសារកន្លងមកពួកគេធ្លាប់មានទំនាស់គ្នាតាមបណ្តាញសង្គមហ្វេសប៊ុក។ លុះដល់ថ្ងៃកើតហេតុ ពេលពួកគេមករាំធុងបាស់ និងមានការរាំប៉ះគ្នា ទើបជម្លោះបានផ្ទុះឡើង រហូតឈានដល់ការប្រតាយប្រតប់ និងបោចសក់គ្នា។
ក្រោយនាំខ្លួនមកសាកសួរ កម្លាំងជំនាញក៏បានធ្វើតេស្តរកសារធាតុញៀនលើយុវតីទាំងអស់ ហើយលទ្ធផលបង្ហាញថា អវិជ្ជមានទាំងអស់។
ដោយសារករណីនេះជាហិង្សាស្រាល មិនមានអ្នករងរបួស និងមិនមានការដាក់ពាក្យបណ្តឹងទៅវិញទៅមក ព្រមទាំងមានការស្នើសុំធានាពីអាណាព្យាបាល និងមានការឯកភាពពីតំណាងអយ្យការអមសាលាដំបូងខេត្តសៀមរាប សមត្ថកិច្ចបានអនុញ្ញាតឱ្យយុវតីទាំង ១០នាក់ ធ្វើកិច្ចសន្យាអប់រំ និងប្រគល់ត្រឡប់ទៅលំនៅដ្ឋានវិញជាបណ្តោះអាសន្ន។
សមត្ថកិច្ចបានបញ្ជាក់ថា ការចាត់វិធានការនេះធ្វើឡើងក្រោមការដឹកនាំ និងយកចិត្តទុកដាក់របស់ថ្នាក់ដឹកនាំនគរបាលជាតិ និងរដ្ឋបាលខេត្តសៀមរាប ដើម្បីរក្សាសន្តិសុខ សណ្តាប់ធ្នាប់សាធារណៈ និងទប់ស្កាត់កុំឱ្យជម្លោះរបស់យុវជនវិវត្តទៅជាអំពើហិង្សាធ្ងន់ធ្ងរ៕
