កងទ័ពយេម៉ែនបាននិយាយកាលពីថ្ងៃអាទិត្យថា យុទ្ធជនក្រុមហ៊ូទី២៦០នាក់ត្រូវបានសម្លាប់ ក្នុងប្រតិបត្តិការយោធា ៩៧លើក ដែលមានគោលដៅវាយប្រហារកងកម្លាំងជំនួយរបស់ហ៊ូទី នៅខេត្ត Taiz និង Lahj។
ប្រភពពីសារព័ត៌មានAA news នៅថ្ងៃទី៤ខែតុលា។
អ្នកនាំពាក្យកងទ័ព លោកវរសេនីយ៍ឯក Majed al-Nuzaili បាននិយាយថា ប្រតិបត្តិការទាំងនេះបានប្រើ យន្តហោះចម្បាំង ដ្រូន កាំភ្លើងធំ មីស៊ីល និងអ្នកបាញ់ស៊ីប។
កងទ័ពក៏អះអាងថា បានបំផ្លាញ ឬធ្វើឱ្យខូចខាត យានយន្តយោធា រថយន្តដឹកជញ្ជូន និងសម្ភារៈផ្គត់ផ្គង់ចំនួន ៤៤គ្រឿង។
ប៉ុន្មានម៉ោងមុននេះ កងទ័ពយេម៉ែនក៏បានអះអាងថា យុទ្ធជនហ៊ូទីយ៉ាងហោចណាស់ ៧០០នាក់ត្រូវបានសម្លាប់ ក្នុងប្រតិបត្តិការ ២៥៧លើក នៅតំបន់ប្រយុទ្ធជាច្រើន។ ក្រុមហ៊ូទីមិនទាន់មានប្រតិកម្ម ចំពោះការអះអាងទាំងនេះទេ។
ជម្លោះនៅយេម៉ែនបានបន្តតាំងពីឆ្នាំ ២០១៤ បន្ទាប់ពីក្រុមហ៊ូទីបានដណ្តើមកាន់កាប់រដ្ឋធានី Sanaa និងខេត្តមួយចំនួន។ នៅឆ្នាំ ២០១៥ សម្ព័ន្ធដឹកនាំដោយអារ៉ាប៊ីសាអូឌីតបានចូលធ្វើអន្តរាគមន៍ ដើម្បីគាំទ្ររដ្ឋាភិបាលដែលអន្តរជាតិទទួលស្គាល់។ បទឈប់បាញ់ឆ្នាំ ២០២២ បានបរាជ័យនៅខែកក្កដា ហើយការប្រយុទ្ធបានកើនឡើងវិញ៕
