(កណ្តាល)៖ ស្របពេលដែលប្រជាពលរដ្ឋរាប់រយនាក់ ផ្ទុះការតវ៉ាសុំរក្សាទុក”ដីមេទឹកព្រា”ជាសម្បត្តិរដ្ឋដដែល សម្រាប់ឱ្យពួកគាត់អាស្រ័យផលដូចមុនៗ។
*ស្រាប់តែលោក ម៉េង ឈាងហេង មេឃុំវិហារសួគ៌
អះអាងថា”ដីមេទឹកព្រា”ទំហំ១៧២ហិកតា
គឺឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានប្រមូលទិញអស់ហើយ ក្នុងតម្លៃ១ហិកតា២.៥០០ដុល្លារ។
សូមជម្រាបថា”ដីមេទឹកព្រា”ទំហំ១៧២ហិកតា ស្ថិតក្នុងភូមិព្រៃចាស់ ឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល
ដីនេះបច្ចុប្បន្ន បានក្លាយជាកម្មសិទ្ធិក្រុមហ៊ុន ឃុន សៀ ដោយមាន{ប្លង់រឹង}តាមរយៈស.ជ.ណ.លេខ៤៥៣.ដ.ប ចុះថ្ងៃទី២៤ ខែសីហា ឆ្នាំ២០២១។
*លោកមេឃុំវិហារសួគ៌ បានថ្លែងប្រាប់”ដើមរាំង”នៅថ្ងៃទី០៣.០៣.២០២៦ថា ឯកឧត្តម អូន ព័ន្ធមុនីរ័ត្ន ពិតជាបានប្រមូលទិញ”ដីមេទឹកព្រា”ត្រង់ចំណុចខាងលើ ពីប្រជាពលរដ្ឋអ្នកអាស្រ័យផល ប្រាកដមែន!។
លោកមេឃុំ ក៏បានរៀបរាប់អំពីដំណើរដើមទងនៃប្រវត្តិ”ដីមេទឹកព្រា”ថា ដីនេះពីមុនមកជាដីសាធារណៈរបស់រដ្ឋសុទ្ធសាធ ពុំមែនជាដីកម្មសិទ្ធិបុគ្គលណាម្នាក់ឡើយ.!។
ប៉ុន្តែនៅឆ្នាំ២០០៦ ក៏មានទំនាស់រវាងពលរដ្ឋអ្នកមានដីនៅខាងក្រៅ និងអ្នកអាស្រ័យផលក្នុង”មេទឹកព្រា”។
ទន្ទឹមនិងនោះ នៅឆ្នាំ២០០៧ ឯកឧត្តម អូន ព័ន្ធមុនីរ័ត្ន ក៏បានប្រមូលទិញ”ដីមេទឹកព្រា”ពីអ្នកអាស្រ័យផល ក្នុង១ហិកតា២.៥០០ដុល្លារ ដើម្បីលែងឱ្យពលរដ្ឋ អាស្រ័យផល”ដីមេទឹកព្រា”តទៅទៀត។
*ចំពោះសំណួរថា ចុះបើឯកឧត្តម អូន ព័ន្ធមុនីរ័ត្ន ជាអ្នកប្រមូលទិញ.ហេតុអ្វីបានជាដី១កន្លែងនេះក្លាយជាកម្មសិទ្ធិ”ក្រុមហ៊ុន ឃុន សៀ អ៊ីមផត អិចផត”ទៅវិញ..!។
*ត្រង់ចំណុចនេះលោកមេឃុំ បានឆ្លើយថា មកពីដីនោះ គេលក់យកលុយធ្វើសាលាខេត្តកណ្ដាល.!។
បើតាមលោក ម៉េង ឈាងហេង”ដីបឹងមេទឹកព្រា”ទាំង១៧២ហិកតា គឺបានចេញប្លង់រឹងឱ្យទៅ”ក្រុមហ៊ុន ឃុន សៀ អ៊ីមផត អិចផត”អស់ហើយ ហើយប្លង់រឹងនេះ ចេញតាំងពីឆ្នាំ២០២២ម្ល៉េះ។
*ចំពោះសំណួរថា តើលោកថៅកែ គង់ ឃាង មានទិញ”ដីមេទឹកព្រា”ដែរឬទេ.?។
*លោកមេឃុំ បានឆ្លើយថា លោក គង់ ឃាង ពិតជាបានទិញ”ដីមេទឹកព្រា”អស់១ផ្នែកប្រាកដមែន គឺសម្រាប់ទុកជីកកាយយកអាចម៍ដីលក់.!។
ប៉ុន្ដែឥឡូវ ដីនេះបានក្លាយជាកម្មសិទ្ធិក្រុមហ៊ុន ឃុន សៀ អញ្ចឹងទើបលោក គង់ ឃាង ទាមទារសំណងពីក្រុមហ៊ុន..!។
ខណៈបច្ចុប្បន្ន ក្រុមហ៊ុន ឃុន សៀ ក៏បានជួយដោះស្រាយនិងផ្ដល់ប្រាក់ឱ្យលោក គង់ ឃាង ក្នុង១ហិកតា២.៥០០ដុល្លារដោយចាត់ទុកថា(ជាថ្លៃដើម)។
*ចំពោះសំណួរថា តើអាជ្ញាធរ នឹងដោះស្រាយយ៉ាងណា.? បើពលរដ្ឋរាប់រយនាក់ ផ្ទុះការតវ៉ាបែបនេះ..?។
*លោកមេឃុំបានឆ្លើយថា ដីមាន(ប្លង់រឹង)ហើយ លោកមិនអាចដោះស្រាយតាមសំណើពលរដ្ឋបានទេ..!!។
*ដោយឡែកលោក គង់ ឃាង ឯនេះវិញបានបដិសេធថា រូបលោកមិនជាប់ពាក់ព័ន្ធនិង”ដីមេទឹកព្រា”ឡើយ!។
ចំពោះសំណងផលប៉ះពាល់ គឺពលរដ្ឋជាអ្នកទទួលពីក្រុមហ៊ុនផ្ទាល់ ក្នុង១ហិកតា២.៥០០ដុល្លារ ពុំមានឈ្មោះរបស់លោក ទទួលលុយនោះឡើយ.!។
ក្នុងនោះលោក គង់ ឃាង ក៏បានលើកឡើងស្រដៀងគ្នាដែរថា ឯកឧត្តមរដ្ឋមន្ត្រីក្រសួងសេដ្ឋកិច្ច គឺពិជាបានទិញ”ដីមេទឹកព្រា”ប្រាកដមែន។
*ជាមួយគ្នានេះ”ដើមរាំង”បានសុំការបំភ្លឺពីឯកឧត្ដម គឹម សុភៈ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ប៉ុន្តែលោកពុំបកស្រាយឡើយ ដោយថារវល់កម្មវិធីបុណ្យសព..!។
*ជុំវិញរឿងរ៉ាវខាងលើ ពលរដ្ឋនៅភូមិព្រៃចាស់ ជាង១០០នាក់
បាននាំគ្នាផ្ទុះការតវ៉ាតាំងពីថ្ងៃទី១ទី២និងទី៣ ខែមីនា ឆ្នាំ២០២៦។
ដោយទាមទារឱ្យក្រុមហ៊ុន ឃុន សៀ ដកគ្រឿងចក្រចេញ និងបញ្ឈប់ការឈូសឆាយ”ដីមេទឹកព្រា”ដើម្បីរក្សាសភាពដើម.!។
ក្រោយមានការតវ៉ាបែបនេះ គ្រឿងចក្រក៏បានផ្អាកសកម្មភាពជាបណ្ដោះអាសន្ន!។
ក្នុងពេលតវ៉ានោះ
ពលរដ្ឋបានអះអាងថា”ដីមេទឹកព្រា”គឺពួកខ្លួនតែងតែអាស្រ័យផល(កសិកម្ម.នេសាទ.រកអុស)តកូនតចៅ តាំងពីបូរាណរហូតដល់សព្វថ្ងៃ..!។
ជាក់ស្តែង ពួកគាត់សុំរក្សាទុក”ដីមេទឹកព្រា”ជាសម្បត្តិសាធារណៈដដែល សម្រាប់ឱ្យពួកគាត់អាស្រ័យផលដូចមុនៗ។
*ជាការឆ្លើយតបលោក ហ៊ែល ម៉ូដេត ប្រធានការិយាល័យ រៀបចំដែនដី នគរូបនីយកម្មសំណង់ និងភូមិបាលស្រុកខ្សាច់កណ្ដាល បានថ្លែងប្រាប់”ដើមរាំង”ថា ដីត្រង់ចំណុចខាងលើគឺមាន.ស.ជ.ណ.ដោះដូរនិងប្រគល់ឱ្យក្រុមហ៊ុន ហេតុនេះមន្ត្រីជំនាញអនុវត្តតាម ការសម្រេចរបស់រាជរដ្ឋាភិបាល..!!។
*រីឯលោក ចេង ឌីណា អភិបាលស្រុកខ្សាច់កណ្ដាល បានថ្លែងស្រដៀងគ្នាដែរ ថាដីនេះមាន.ស.ជ.ណ.និងមាន(ប្លង់រឹង)រួចទៅហើយ។
*ចំណែកលោក សុក កាន់ណារិទ្ធ ប្រធានមន្ទីររៀបចំដែនដី នគរូបនីយកម្មសំណង់ និងសុរិយោដី ខេត្តកណ្ដាល
ទទួលទូរស័ព្ទហើយ តែលោកមិននិយាយរួចក៏ចុចបិទ!!។
*ចំពោះលោក ប្រាក់ ឡាក់ ប្រធានមន្ទីរធនធានទឹកនិងឧតុនិយម ខេត្តកណ្ដាល
បានថ្លែងប្រាប់”ដើមរាំង”ថា លោកបានចាត់ឱ្យអនុប្រធានមន្ទីរ ចុះពិនិត្យហើយ។
*ចំពោះសំណួរថា តើបានកសាងសមិទ្ធផលអ្វីខ្លះហើយ ជាថ្នូរនឹងដី១៧២ហិកតានេះ.?។
*លោក ប្រាក់ ឡាក់ បានឆ្លើយថា យើងមានការជួសជុលច្រាំង”ព្រែកត្នោត” ហើយបើចង់ច្បាស់សួរទៅរដ្ឋបាលខេត្ត..!។
*លោក ឌឹម បូរ៉ា អភិបាលរងខេត្ត និងជាអ្នកនាំពាក្យរដ្ឋបាលខេត្តកណ្ដាល
បានថ្លែងថា លោកឃើញមានការកសាងសមិទ្ធផលខ្លះដែរ ជាថ្នូរនឹង”ដីមេទឹកព្រា”ប៉ុន្តែធ្វើបានកម្រិតណានោះ គឺលោកមិនច្បាស់ទេ ចាំឆែកមើលសិន..!។
*តាមរយៈសារព័ត៌មាន ពលរដ្ឋសុំស្នើយ៉ាងទទូចដល់ឯកឧត្តម គួច ចំរើន អភិបាលខេត្តកណ្ដាល
ឯកឧត្តមកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ
ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម
ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ
ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់
ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មេត្តាចាត់មន្ត្រីជំនាញ អព្យាក្រឹតចុះស្រាវជ្រាវ ព្រោះសង្ស័យមានអំពើពុករលួយ ពាក់ព័ន្ធការធ្វើរបាយការណ៍ស្នើសុំ.ស.ជ.ណ.ដើម្បីដោះដូរ”ដីមេទឹកព្រា”និងសុំឱ្យពិនិត្យចំពោះការកសាងហេដ្ឋារចនាសម្ព័ន្ធ.ផ្លូវ.លូ.ស្ថានីយ៍បូមទឹកនៅក្រុងតាខ្មៅ.ស្រុកស្អាង.និងស្រុកខ្សាច់កណ្ដាល.ថា តើធ្វើបានអ្វីខ្លះហើយ ជាថ្នូរនឹងដី១៧២ហិកតា??៕
