(ភ្នំពេញ)៖ នៅព្រឹកថ្ងៃទី១៧ ខែកក្កដា ឆ្នាំ២០២៦ ស្ថានទូតរុស្ស៊ីប្រចាំនៅកម្ពុជា បានចេញមកបញ្ជាក់ថា ស្រ្តីអនាថា ដែលមានកុមារតូចៗដើរជាមួយ នៅតាមសំយ៉ាបផ្ទះរបស់គេ ក្នុងរាជធានីភ្នំពេញនោះ.!។
មិនមែនជាជនជាតិរុស្ស៊ី ដូចការផ្សាយរបស់សារព័ត៌មានមួយចំនួន នោះឡើយ។
ផ្ទុយទៅវិញស្រ្តីរូបនេះ គឺជាពលរដ្ឋមកពីប្រទេសតួកមេនីស្ថាន ដែលរស់នៅក្នុងភ្នំពេញ តាំងពីឆ្នាំ២០១៩ ហើយពួកគេគ្មានសញ្ជាតិ នៃសហព័ន្ធរុស្ស៊ីនោះទេ..!។
ស្ថានទូតរុស្ស៊ី និងសមាគមអតីតនិស្សិតកម្ពុជាពីសហភាពសូវៀតនិងរុស្ស៊ី បានបញ្ជាក់ថា ស្ថានភាពជាក់ស្តែងរបស់គ្រួសារខាងលើ ផ្អែកតាមព័ត៌មានលម្អិតដែលទទួលបានពី លោកឪពុក រ៉ូម៉ាំង (Roman) នៃព្រះវិហារអរតូដុក (Orthodox Church) ដែលជាអ្នកក្តាប់ប្រវត្តិគ្រួសារនេះច្បាស់ជាងគេ ស្ថានភាពពិតប្រាកដមានដូចខាងក្រោម៖
ស្ត្រីជាម្តាយនិងកូនស្រីច្បង (ដែលចេះនិយាយភាសាខ្មែរ)៖ ពួកគាត់គឺជា ពលរដ្ឋនៃប្រទេសទួរគមេនីស្ថាន (មិនមែនជាពលរដ្ឋនៃសហព័ន្ធរុស្ស៊ីឡើយ)។
ពួកគាត់បាន និងកំពុងស្នាក់នៅក្នុងប្រទេសកម្ពុជា ហួសទិដ្ឋាការ(មិនស្របច្បាប់) ចាប់តាំងពីឆ្នាំ២០១៩។
កូនពៅ(តូចបំផុត)៖ កុមារនេះបានកើតនៅលើទឹកដីកម្ពុជា ប៉ុន្តែរហូតមកទល់ពេលនេះ មិនទាន់មានឯកសារផ្លូវការ សូម្បីតែសំបុត្រកំណើត និងមិនទាន់មានសញ្ជាតិណាមួយនៅឡើយទេ ដែលជាហានិភ័យនៃស្ថានភាពគ្មានរដ្ឋ (Statelessness)។
កូនកណ្តាល តាមប្រភពព័ត៌មាន កុមារនេះមិនមែនជាកូនបង្កើតរបស់ស្ត្រីខាងលើឡើយ។
ម្តាយបង្កើតរបស់កុមារនេះជាជនជាតិខ្មែរ និងឪពុកជាជនជាតិវៀតណាម ប៉ុន្តែត្រូវបានស្ត្រីជាជនជាតិទួរគមេនីស្ថានខាងលើ (ឈ្មោះ វិកតូរីយ៉ា) យកមកចិញ្ចឹមបីបាច់ថែរក្សាតាំងពីទារក ដោយគ្មានឯកសារគតិយុត្តិ ឬលិខិតស្នាមស្មុំកូនស្របច្បាប់ណាមួយឡើយ ហើយកុមារនេះក៏គ្មានឯកសារសម្គាល់ខ្លួនអ្វីទាំងអស់។
សមាគមអតីតនិស្សិតកម្ពុជាពីសហភាពសូវៀត និងរុស្ស៊ី បានអំពាវនាវដល់បងប្អូនប្រជាពលរដ្ឋខ្មែរ និងអ្នកលេងបណ្តាញសង្គមទាំងអស់ មេត្តាជៀសវាងការបញ្ចេញមតិរិះគន់ បង្កការរើសអើង ឬការសន្និដ្ឋានណាមួយដែលគ្មានមូលដ្ឋានច្បាប់៕
