ស្ត្រីប៉ាឡេស្ទីនម្នាក់ឈ្មោះ Ruqayya Rabai បានបាត់បង់កូនក្នុងផ្ទៃ បន្ទាប់ពីរងការភ័យខ្លាច និងតក់ស្លុតខ្លាំង ក្នុងអំឡុងការវាយប្រហារដោយអ្នកតាំងទីលំនៅអ៊ីស្រាអែលនៅភូមិ Al-Tuwani ភាគខាងត្បូងទីក្រុង Hebron ក្នុងតំបន់វេសបែងដែលកាន់កាប់។
ប្រភពពីសារព័ត៌មានTRT World នៅថកថៃទី២២ខែកក្កដា។
តាមសេចក្តីរាយការណ៍ អ្នកវាយប្រហារបានគប់ដុំថ្មទៅលើផ្ទះ រួចដុតផ្ទះ និងវិហារអ៊ីស្លាមក្នុងភូមិ ព្រមទាំងផ្ទះជាច្រើនផ្សេងទៀត។ ស្ត្រីរូបនេះត្រូវបានបញ្ជូនទៅមន្ទីរពេទ្យ ហើយក្រោយមកគ្រូពេទ្យបានបញ្ជាក់ថា នាងបានបាត់បង់កូនក្នុងផ្ទៃ ដោយសារភាពតក់ស្លុតខ្លាំងពីហេតុការណ៍នេះ។
ជាមួយគ្នានេះ ក៏មានសេចក្តីរាយការណ៍ពីការដុតបំផ្លាញដីកសិកម្ម និងទ្រព្យសម្បត្តិរបស់ប្រជាជនប៉ាឡេស្ទីននៅតំបន់ផ្សេងៗក្នុងវេសបែង ហើយមនុស្សជាច្រើននាក់បានរងរបួសក្នុងការប៉ះទង្គិច៕
