នាយករដ្ឋមន្ត្រីអ៊ីស្រាអែល លោកBenjamin Netanyahu បានអះអាងថា អ៊ីរ៉ង់ធ្លាប់ព្យាយាមសម្លាប់កូនប្រុសម្នាក់របស់លោក ប៉ុន្តែលោកមិនបានបញ្ជាក់ថា ហេតុការណ៍នេះកើតឡើងនៅពេលណា នៅទីណា ឬកូនប្រុសមួយណាដែលជាគោលដៅនោះទេ។
ប្រភពពីសារព័ត៌មានAl Jazeera នៅថ្ងៃទី២៥ខែសីហា។
លោកNetanyahu បានលើកឡើងពីការអះអាងនេះនៅក្នុងបទសម្ភាសន៍ជាមួយបណ្តាញទូរទស្សន៍អ៊ីស្រាអែលមួយ កាលពីថ្ងៃចន្ទ ខណៈសម្ព័ន្ធរដ្ឋាភិបាលរបស់លោកកំពុងតាមពីក្រោយក្នុងការស្ទង់មតិ មុនការបោះឆ្នោតទូទៅដែលគ្រោងធ្វើនៅខែតុលា។
លោកបាននិយាយថា អ៊ីរ៉ង់បានកំណត់គោលដៅលើកូនប្រុសរបស់លោក និងព្យាយាមសម្លាប់គេ។ ទោះជាយ៉ាងណា អាជ្ញាធរអ៊ីស្រាអែលមិនទាន់បង្ហាញព័ត៌មានលម្អិត ឬភស្តុតាងសាធារណៈអំពីផែនការដែលលោកបានអះអាងនេះឡើយ។
ការអះអាងនេះកើតឡើងនៅពេលភាពតានតឹងរវាងអ៊ីស្រាអែល និងអ៊ីរ៉ង់នៅតែខ្លាំង បន្ទាប់ពីការវាយប្រហាររួមគ្នារបស់អាមេរិក និងអ៊ីស្រាអែលលើទីក្រុងតេហេរ៉ង់ ដែលបានសម្លាប់មេដឹកនាំកំពូលអ៊ីរ៉ង់ Ali Khamenei និងសមាជិកគ្រួសាររបស់លោកមួយចំនួន។
ក្រោយការស្លាប់របស់ Khamenei កូនប្រុសរបស់លោកគឺ Mojtaba Khamenei ត្រូវបានតែងតាំងជាមេដឹកនាំកំពូលថ្មីរបស់អ៊ីរ៉ង់។ លោក Mojtaba បានប្តេជ្ញាថានឹងសងសឹកចំពោះការស្លាប់របស់ឪពុក៕
